November 28-ah chinfel vek a ni dawn

Mizoram Premier League Season 8 round 14 khelh hmabak match thum chu November 28, Ninganiah khelh vek a ni dawn. Chhun dar 12:00-ah MPL qualifier second leg khelh a ni dawn a, season thara MPL khel tur a hriat nghal ang.

Aizawl DFA first division champion Kanan FC hian MPL hmasa ber qualifier pawh an khel tawh a, FC Bethlehem erawh tun ṭum hi MPL Qualifier an khelh hmasak ber a ni. Qualifier-ah hian Kolasib club Project Veng FC an inhnuhdawh avangin team hnih chiah an ni a, vawi hnih an inkhelha goal khung tam zawkin MPL an khel dawn.

First leg-ah team pahnih hi goal awm loin an inhnehtawk tawh a, tun ṭumah hian an inhnehtawk nawn a nih chuan penalty shootout hmangin MPL khel tur an zawng ang. A chak lo tan MPL khelh theihna kawng a la inhawng dawn a, MPL8-a pasarihna nen playoff an khel ang.

Aizawl FC-in I League an khelh dawn avangin Chhinga Veng nena an inkhel tur chu khelh a ni tawh a, Standly Rosario hoten Alfred Kemah Jaryan-a goal ropui hmangin 1-0 in hnehna an chang. Aizawl FC hian pakhatna dinhmun an nemnghet tawh a, Mizoram Police-in match khat khelh hmabak nei chungin pahnihna a ni chiang tawh bawk.

Chhinga Vengin semifinal ticket an nei tawh a, chutihrualin round tawp bera inkhel result a zirin an awmna erawh a la insawn thei. Hmunruak pakhat hi Electric Veng leh Chanmari FC ten an inchuh dawn. Semifinal khel tur a la chian loh ang thoin relegate tur a la hriat loh. Team pathum Chawnpui FC, FC Venghnuai leh Ramhlun North te chu tling leh tla thei vek an ni.

Tlai dar 2:30-ah Ramhlun North leh Chanmari FC te an inkhel dawn. RNFC hian point thum an hlawh chhuak thei lo a nih chuan an relegate ang a, an chak erawh chuan paruknaah an awm ang a, match hnuhnung result-in an hmalam hun a hril ang. Chanmari tan a danglam lo - semifinal khel tur chuan chak ngei ngei a ngai a, point thum an hlawhchhuah hnu hian FC Venghnuai leh Electric Veng FC result an ngaihchan a la ṭul tho ang.

Tlai dar 5:00-ah Chawnpui FC-in Mizoram Police an hmachhawn ang. Police-in inrintawkna neih nan khelh ṭhat leh chak an mamawh a, Chawnpui tan erawh relegate emaw playoff pumpelh turin chak ngei a ṭul thung. Match hnuhnung berah FC Venghnuai leh Electric Veng FC te an inkhel dawn a, match hmasa pahnih a zirin he inkhel result hi a nghawng a lian dawn.

Chanmari FC-in hnehna an chang a nih chuan Electric Veng tan FC Venghnuai lakah point hmuh ngei a ṭul. Chutiang bawkin Ramhlun North an chak a nih chuan MPL kaithar FC Venghnuaiin relegate lo turin point hmuh hrim hrim a ngai a, playoff pumpelh tur phei chuan Chawnpui point hmuh zat aia tam an hmuh a ṭul avangin Mizoram Police puihna an mamawh ang.