Australia-in Pakistan sawp

Australia chuan Pakistan nen Test match vawi hnih an khelh tura a hmasa zawkah innings leh run ngain hnehna an chang. The Gabba-ah first Test hi November 21-24 chhung khan khelh a ni a, second Test hi November 29 aṭangin Adelaide Oval-ah an khel ṭan ang.

Pakistan ṭhumvawrah an vannei a, vuak hmasak an thlang. Mikhual team hian run 240 an siam a, Asad Shafiq-a'n run 76 a siam. Aussies bowler zingah Mitchell Starc-a'n wicket li laiin run 52 a pe a, Pat Cummins (60/3) a che ṭha bawk.

Australia tan David Warner (154) leh Marnus Labuschagne (185) ten century an siam a, Joe Burns (97) leh Matthew Wade (60) ten half century siam bawkin mualneitu hian run 580 an vaw chhuak.

Second innings-ah Pakistan tan Babar Azam-a'n run 104 siamin Mohammad Rizwan-a'n run 95  tlin ve bawk mah se Aussie bowler Marnus Labuschagne-a'n wicket li (63/4) a la a, Starc-a'n (73/3) rawn thlawp ṭha bawkin Pakistan hi run 335-ah an thi vek a. Australia hian ni linaah vaw ve kher tawh loin hnehna an chang.