PSG mikhual tur Real tan chak a ngai

European football-a rorel ṭhintu Real Madrid chuan zanin dar 1:30 hian Champions League group match khel turin Paris Saint-Germain an mikhual dawn a, hnehna an chan chuan last 16 an lut chiang ang. 

PSG hian group A-a match li khelh tawhah point 12 neiin hma an hruai mek a, an hnuai chiahah point sarih nei Real an awm - Zinedine Zidane naute hian Santiago Bernabeu-ah French club ṭha an lo hneh thei a nih chuan inrintawkna an neih belh dawn. 

Group A inkhel dangah zanin dar 11:25 hian Galatasaray chuan Club Brugge an mikhual dawn bawk a, Belgian club ṭha  Brugge hian hnehna an chang zo lo a nih chuan Real hi chak lo pawh ni se an tlang tho ang. PSG chu group A aṭanga tling chiang tawh awmchhun an ni a, Real an chak loh a, Club Brugge an chak chuan French club hnung zui tur hi group stage match tawp ber thleng nghah a ṭul dawn thung. 

Madrid khaw club-in Champions League-a an match hmasa berah 3-0 in PSG an ngam lo nghal a, league lamah an talbuai bawk avangin coach Zinedine Zidane a dinhmun a him lo hman hle. Mahse, tun hnaiah Real an insiamṭha a, league lamah an khingpui Barcelona an chet chhiat ve tho bawk avangin table-ah Barca nen point hmuh zat inangin pahnihna an ni. 

Champions League-a an match hnuhnung berah 6-0 ngawtin Galatasaray an sawp bawk a, Spanish club hi an insiamṭha mek tih a lang - mahse Real kaltluang lai titawp turin PSG an ṭha tawk. Spanish chanchinbu lar Marca chuan, "Zidane hnuaiah Real an vul ṭan leh ta," tiin a ziak a, French manager enkawlna hnuaiah Madrid khaw club-in an ropuina an nei let leh mekah an ngai. 

Thawhṭanni khan Real Madrid tan Bale chu training zingah a tel lo a,  Real Sociedad laka inkhel bul ṭanten gym session an neihnaah a tel thung. Real kalphungah league match an khelh zawh chiaha bul ṭan player-ten training an zawm nghal ngai lo a, a hahdam zawk gym lamah an ti phawt ṭhin. 

Bale hian Sociedad lakah bul ṭan lo mah se bench aṭanga luhtir a ni a, bul ṭan ho ang thoa training zawm tir nghal a ni lo hian sawi zui a hlawh hle - PSG a hmachhawn ngei erawh rin a ni. Tlarhmaah dan pangngaiin Karim Benzema chu Real innghahna tur a ni dawn a, Real-in hnehna chan an duh chuan French striker a chet ṭhat a ṭul ang. 

International break laia Bale-a chet dan avangin Real fans an lungawi lo a, Sociedad lakah Welsh forward hian auh el a tawk nasa hle - a khelh ṭhat miau avangin hun tawp lamah erawh kut benga lawm a ni thung. Santiago Bernabeu-a inkhel tur an nih avangin Bale hian eng ang taka lawm nge a hlawh leh dawn hriat a châkawm a, players leh coaching staff lam chuan Bale an thlawp thu an sawi tawh. 

Real coach Zidane chuan, "Season tluana auh el a tawh loh hram ka beisei," tiin a player a chhan a, season ṭantirah Welsh forward hi duh lo mah se team tana a la ṭangkaizia a hriat avangin amah thlawp turin fan-te a duh. 

Madrid legend  Emilio Butragueno chuan, "Kan mi leh sa a ni a, kan thlawp tur a ni," a ti a, a khelhpui  Fede Valverde chuan, "Sociedad laka goal kan lawm ho pawh kha amah kan thlawpzia lantirna a ni a, theihtawp a chhuah reng a ni," tiin a sawi ve bawk. 

Real tana thu hriat nuam lo tak tur chu tun season-a a vawi khat nan Neymar leh Kylian Mbappe ten PSG tan bul an ṭan mai thei tih hi a ni a, player pahnih hi hliam vanga an talbuai reng hnuin ngai an awh chho ṭan. 

Neymar hi October hnua a vawi khat nan kartawp league match-ah a inlan a, Mbappe chu hun tawp hnaih lamah bench aṭanga luhtir a ni bawk - Real tan hmuh an nuam lo ang. PSG boss Thomas Tuchel-a'n duhthlan tur a ngah hle - tun season-a inelna hrang hranga goal 10 khung tawh Mauro Icardi a la nei a,  Angel di Maria hi Real laka bench-a dah atan chuan a ṭha mah mah bawk. 

Edinson Cavani a la awm cheu a, Julian Draxler leh Pablo Sarabia ten attacking football khelh nuam an ti viau bawk - PSG buaina hi player ṭha an ngah leh lutuk hi a ni a, Real tan hmuh nuam a ni lo ang.