Mourinho tan Champions League fiahna

Premier League-ah Jose Mourinho a lo kir leh ta a, league-a a match hmasa berah Tottenham Hotspur chu West Ham lakah 3-2 in hnehna a chanpui nghal. 

Inkhelh zawhah Mourinho bawkin bawrzui a hlawh a, "Hnehna ka chan hi keimah vanga ngaitu an awm a nih chuan ka haw ngawt ang," a ti zui zat - hna a la thawh tak tak hman loh thu a sawina a ni. Premier League kartawp inkhel a zo a, Champions League a lo lang lehnghal. Mourinho hian zanin dar 1:30-ah Olympiakos a mikhual dawn a, Portuguese manager bawkin en rawn a hlawh leh dawn. 

Spurs hian hnehna an chan chuan last 16 an lut chiang dawn a, an tlawm a nih pawhin zanin group B inkhel dangah tling chiang tawh Bayern Munich-in Red Star Belgrade an hneh chuan an tlang tho ang. 

Mourinho-a'n Spurs a pan tirha a rilrua awm hmasa ber chu London club-a cham nghet tura Harry Kane hmin a ni a, English striker pawhin a pu thar hnuaiah nomawi chawi ngei a beisei. Kane chuan, "Kan coach hian club-a enkawl apiangah nomawi a chawi zel a, chu chu zep theih pawh a ni lo. Ani pawhin hnehna chan zel a duh a, keipawhin nomawi chawi ve ka duh tawh. 

"He hmunah ngei nomawi chawi ka duh a, Champions League leh FA Cup-ah beiseina sang tak kan nei a ni," a ti. Kane chuan, "Mourinho ang coach neih chuan inrintawkna min pe a, team-ah pawh rinna nasa tak kan neih phah a ni," tiin a sawi chhunzawm a, zaninah pawh chak turah a indah ang. 

Kane-a sawi angin Mourinho-a'n a kalna apiangah nomawi a chawi a, a hlawhchhamna ber anga an sawi Manchester United-ah meuh pawh League Cup leh Europa League nomawi a chawi. 

Portuguese manager hnuaia Spurs-in nomawi an chawi dawn chuan Mourinho-a'n tun hnaia form lo Dele Alli a chher hriam lehzual a ngai a, Kane-a'n a phu ang thlawpna a hmuh theih nan a chhehvel player-te rilru suk thlek thlaksak a ngai bawk. 

Mourinho hian Chelsea-ah hlawhtling takin Frank Lampard a lo kaihruai tawh a, Blues manager ni zui ta player ropui anga Dele Alli hi a chher theih beiseina a sang hle. Inter Milan tana treble champion lo ni tawh Mourinho hian Dele a hmuh hmasak ber hian, "Dele nge i nih a unaupa?" tiin zawhna a pe a, "Dele" tia English midfielder-in a chhan hnuah, "A nih chuan Dele Alli khelh danin khel tawh ang che," tiin a hrilh!

Mourinho chuan, "Khawvela striker ṭha ber pawl a ni a, rinhlelh tur a awm lo. Kane hian striker ṭha tak a nihna khawvel hnena pawmtir tur chuan hmabak a la nei a, chu chu nomawi a ni. 

"Kane hian nomawi chawi a mamawh a, Spurs mai ni lo England nen pawha champion a mamawh," tiin a sawi a, a sawi dik - English striker hian Spurs tan match 269-ah goal 175 a khung tawh a, nomawi chawi a la nei lo. 

Khawthlang media-ten nasa taka an sawi chu sum hmang tam ṭhang Mourinho-a'n budget tlem Spurs a zawm hi a ni a, Portuguese manager erawh a buai phah lo. 

Mourinho chuan, "Porto leh Inter-ah pawh sum ka hmang lo. Spurs hi ka ngaina a, player-te hi ka duh sa vek an ni a, sum hman ka mamawh lo," tiin a sawi - a squad neihsa nen eng chen tak thleng ang maw? A chhanna pek kan ni thuai dawn.