Nadal hoin Spain an chungnung ber

Pathianni zan khan Madrid khawpuiah tennis fans chu lawm avangin an sapatal a, an ram khawpuiah ngei Spain chuan Davis Cup nomawi an chawi. Hlawhtlinna an chan hnuah Rafael Nadal chuan ram tan an theihna sang ber an hlan thu a sawi chhuak.

Davis Cup final-ah Spain hian Canada 2-0 in an hneh, best of three match khelh tura a hmasa pahniha hnehna an chan avangin doubles match khelh ngai loin an tlang. Group stage hnu lamah Spain hian Argentina, Great Britain leh Canada te an hneh a ni.

Canada hian kum 119 hnua a vawi khat nan Davis Cup final hi an khel ve leh chauh a, hlawhtlinna chang lo mah se an player Denis Shapovalov (20) leh Auger-Aliassime (19) te an la naupan avangin hun lo kal zel turah beisei an nei sang thei ang.

Tournament khelh laklawh laiin Roberto Bautista Agut-a pa a thi a, a pa thih aṭanga ni thum hnuah Agut hi ram tan a inlan lehnghal. Ani hian singles match hmasa zawkah Felix Auger-Aliassime 7-6 (7-3), 6-3 in a hneh - hnehna a chan hi a pa tan hlan zuiin a biangah mittui a luang.

Match hnihnaah Nadal a rawn inlan a, world number 1 hian player beiseiawm tak Denis Shapovalov chu 6-3, 7-6 (9-7) in a hneh a, a vawi ruk nan ram leh ram mipa tennis team hmanga inelnaah an ram a champion pui; 2011 hnu lama an champion lehna hmasa ber a ni.

Davis Cup hi kuminah a kalphung thlak a ni a, team 18 inlan chu group parukah ṭhen hran an ni. Inelna zawng zawng hi Madrid khawpuiah vek khelh a ni a, group tina mite an inkhelh kual hnuah a sang pahnih zel bakah pahnihna zinga ti ṭha pahnihten quarterfinal an lut.

Kumin Davis Cup-ah Nadal hian match a khelh zawng zawngah hnehna a chang vek a, 2004 hnu lamah chuan he inelna bika singles match a khelh zawng zawngah hnehna a la chang vek hial a ni. Spain captain Sergi Bruguera chuan, "Hetiang hun hi chu thu a sawifiah thiam a har, ṭum danga kan hlawhtlinna tawn tawh zawng zawng aiin a ropui zawk emaw tih mai tur a ni. Roberto kha a pa vui aṭanga ni khat hnu lekah ropui takin ram tan a inlan thei.

"Rafa hi chu player dangte nena khaikhin chi a ni lo, mimal inelna hautak a khelh hnuah pawh ramin a mamawh a nih chuan doubles huangah ṭha takin a inkhel leh thei zel," tiin Grand Slam vawi 19 champion tawh Nadal chu an ram tana a pawimawhzia a sawi chhuak.

Tennis huangah chuan mimal inelna a pawimawh a, chutih rualin player tam tak chuan ram tana result ṭha neih hi an dah sang ṭhin. Nadal chuan Spain tana hlawhtlinna a chang chu atan lawmna sang ber a nih thu a sawi.

Kum 33 mi Nadal chuan, "Chawlhkar hautak leh nuam tak chu a ni. Match hnuhnung berah player ṭha leh khauh tak mai ka hmachhawn a, khatiang inkhel pawimawha hnehna chan theih kha chu a nuam hle, taksa bakah rilru pawh a hah tel takzet. Mahse, ram tan chuan theihna sang ber kan hlan ṭhin.

"Player tinin hetiang hlawhtlinna chan harsatzia kan hre vek, kei leh kan ram tan chuan hetiang baka season kharna duhawm hi a awm thei tawh chuang lo ang. Stadium chhunga fans au thawm kha a ngaihnawm a, hlimna vawrtawp kan thlen hi kan theihnghilh ngai tawh loh tur a ni," a ti.