Roma chakna Smalling

Pathianni zan Serie A inkhelah AS Roma tan Chris Smalling chuan goal khat a khung bakah a ṭhiante khung tur vawi hnih a siamsak a, a club hi Brescia lakah 3-0 in hnehna a chanpui.

Rome khawpuia inkhelah table mawng-phaha awm Brescia tan Roma an ṭha hret. Manchester United aṭanga loan hmanga an hawh Smalling hian minute 49-naah Lorenzo Pellegrini corner pet a tauh lut. Minute riat a liam hnuah Smalling hian tlarhnunga a dinpui Gianluca Mancini khung tur a siamsak a, England international thawhrah sengin striker Edin Dzeko chuan chak nemnghehna a khung bawk.

Roma hian league match 13 khelh tawhah point 25 neiin palina dinhmun an luah a, an hnuai chiaha awm Cagliari chuan nizan khan Lecce an hmachhawn, hnehna an chang a nih chuan Roma hi a sang pali aṭangin an nek chhuak leh rih ang.