Anfield-ah Liverpool dinhmun a chiang thei

Champions League nomawi kawltu Liverpool chu zanin dar 1:30-ah an inlan dawn a, Napoli an mikhual dawn. Reds hian hnehna an chan chuan last 16 lut turin an tling chiang ang. 

Group E-ah Liverpool hian match li khel tawhin point kua an nei mek a, Napoli hian point riat neiin Reds hnuai chiahah an awm thung. Red Bull Salzburg chuan group E inkhel dangah Genk FC an lenchilh dawn bawk a, zanin dar 1:30-a inkhelah hian Salzburg an tlawm a nih chuan Liverpool leh Napoli hi eng result pawh thleng se an tlang ang. 

Liverpool tan ngaihngam taka awm chi erawh a ni lo - Napoli lakah tlawm se, Salzburg hi chak bawk ta se an dinhmun a derthawng thei. Match tawp berah Austrian club hi an la lenchilh leh dawn a, a zawna an tlawm chuan group stage aṭangin an tla daih thei. 

'Mitin tana chanchin lawmawm' ni chiah lo 'Liverpool tana chanchin lawmawm' nimin khan a thleng a, Napoli-in an player pawimawh Lorenzo Insigne chu Anfield-ah hliam vangin an hruai thei dawn lo. Arkadiusz Milik chu Napoli tan a inlan thei dawn lo bawk a, Italian club hian tlarhmaa an player chhuanvawr pahnih awm lo chungin Liverpool an hmachhawn dawn tihna a ni - a harsa dawn. 

Milik hian match riatah goal nga a khung tawh a, kum 28 mi Insigne hi goal khung uar tak ni lo mah se team tana player ṭangkai a nih avangin a tel lo tur hi Italian club-in an tuar ngei ang. Hriat tel tur erawh Belgian forward Dries Mertens leh Fernando Llorente te an la awm tho a, Liverpool tlarhnung tan thlamuan leh lutuk a sual ang - an khelh ṭhat ni chuan Europe-a forward ṭha pawl an ni. 

Napoli-in an player pawimawh pahnih Anfield-ah an hruai thei dawn lo a, chu aia chanchin lawmawm lo zawk chu club chhungkua an buai mek nia Italian media-ten an sawi hi a ni. November thlatir khan result ṭha an neih theih loh avangin club president Aurelio De Laurentiis chuan a player-te chu training retreat nei turin a hrilh a, hei hi coach Carlo Ancelotti leh player-te chuan thil ṭul loah ngaiin an ti duh lo. 

De Laurentiis thinrim hian October-a player-te hlawh a hreng mek a, an hlawh aṭanga 25% cut a tum bawk niin Italian chanchinbu lar La Gazzetta dello Sport chuan a tarlang. Midfielder pawimawh Allan chu a hlawh chanve cut sak a ni dawn a, player-te hian an ukil an rawn ve mek bawk niin an sawi bawk - buai chungin Anfield-ah Napoli an leng dawn. 

Players hliam leh chhungkaw buaina awmchungin Napoli-in Anfield an lenglut dawn a, a nihna takah chuan Italian club tan result ṭha beisei ngam chi niin a lang lo. Hetihlai hian Liverpool erawh chanchin lawmawm lam hlirin a la umzui rih a, Premier League match 13 khelh tawhah tlawm la nei loin table chung ber an luah mek. Team talbuai Napoli hneh loh hi mualphona a tling dawn. 

Crystal Palace laka an chak ṭuma inlan lo Mohamed Salah chu Jurgen Klopp chuan a dam ṭhat tawh thu a sawi a, AS Roma tan a khelh laia Italy-a lo tlangnel tawh forward hi Italian club lakah a pawimawh ang. Salah a dam tawh avangin Reds tlarhma 'original' Roberto Firmino, Sadio Mane leh Salah te an inkawp leh thei dawn tihna a ni a, Napoli tan a ngaih ṭhat thlak loh. 

•    Liverpool leh Napoli inkhela chak zawk zawkin last 16 an lut ang. 

•    Red Bull Salzburg-in Genk FC an ngam loh chuan eng result pawh thleng se Reds leh Napoli an tlang ang a, Salzburg an tla 

thung ang. 

•    Genk-in beisei tur an nei tawh lo a, Salzburg an hneh chuan pathumna nih a, Europa League round of 32 khelh an la beisei 

thei ang.