United hmachhawn lo tur Aguero

Manchester City striker Sergio Aguero chu a malpui tihrawl hliam vanga a chawlh rih a ngai dawn a, manager Pep Guardiola chuan December 9-a Manchester United nen an inkhelh hunah a chhawr theih a beisei lo.

Argentina international hi Chelsea 2-1 a an hneh ṭumin a hliam vang hian minute 77-naah lakchhuah a ni. Season hmasa khan a malpui hliam vang hian match nga a khel thei tawh lo a, kuminah pawh a chawlh leh rih deuh a ngai dawn tihna a ni.

Man City manager Guardiola chuan, "Sergio hi a chawlh rih a ngai, Man United hmachhawn thei tur chuan thil mak a thlen a ngai hial ang," tiin tun season match 16 aṭanga goal 13 khungtu chungchang a sawi chhuak. Kum 31 mi Aguero a inlan thei lo a nih pawhin City hian Gabriel Jesus an la nei tho. Brazil international hian Aguero hmunruak a luah thei tura ngaih a ni a, chutih rualin match 16 aṭanga goal nga chauh khung a nih avangin atan hna erawh a hautak hle ang.

Defender rinrawl Aymeric Laporte inhliam vangin Man City hi an tlarhnung a phui hlei thei lo a, tunah Oleksandr Zinchenko a hliam leh mek bawk. Tlarhma lamah hian Leroy Sane chu season tir aṭangin an chhawr thei lo bawk a ni. Spanish manager Pep chuan, "Thil thlen dan hi chu a pangngai a ni, duhthusamah chuan player zawng zawng hi inkhel thei se tih a ni. Mahse, duhthusama hun hman ringawt chu awmzia a awm lo.

"Player kan nei ṭha tawk a, kan tum ram min thlenpui turin ka nauten theihna an nei sang tawk, kan rilru puthmang a dik a nih phei chuan kan ṭha lehzual ang," tiin a naute chungah rinna a nghat. City hian nizan khan Champions League-ah Shakhtar an hmachhawn a, an tlawm a nih loh chuan last 16 an lut chiang ang. Premier League lamah erawh hmahruaitu Liverpool nen an inkarah point kua a awm tawh avangin nomawi humhim a harsa dawn.