Chennaiyin 'comeback' a ropui

Thawhṭanni zan Indian Super League inkhelah result ropui a thleng a, injury time-a goal thum luhna inkhelah Chennaiyin chuan 2-1 in Hyderabad FC an hneh!

Chennai khawpuia inkhelah goal lut loin team pahnih an ṭin mai dawn niin a lang hman a, mahse hun pek belh minute hnihnaah Andre Schembri chuan goal a rawn khung. Maltese striker goal khung hi Chennai club tan chakpui mai tawh tur nia a lan laiin Hyderabad club tan Sunderland centre back hlui Matthew Kilgallon chuan si phurh a rawn sut!

Mahse, a la goal dawn - hun pek belh minute tawp rualin Nerijus Valskis chuan goal a rawn khung ve leh a, Lithuania international goal khung hi Chennai club-in hnehna chan nan an hmang. South Indian club hian tun season league match nga an khelha hnehna an chan vawi khatna a ni a, an goal khung vawi khatna a ni bawk!

Coach John Gregory chuan ban mai a hnial loh thu thlengin a lo sawi tawh a, mahse Hyderabad laka hnehna an chan tak avangin inrintawkna an neih belh ang. Chennaiyin tan Jeje Lalpekhlua chu hliam vangin a la inlan thei lo a, hliam tenau nei Jerry Lalrinzuala leh Laldinliana Renthlei ten bench lamah hun an hmang tluan bawk. 

Aizawl FC defender hlui Masih Saighani chuan Chennaiyin tan hian bul a ṭan thung a, second half minute 68-naah lak chhuah a ni.