Aston Villa chak ve leh ta

Premier League match thum a zawna an tlawm hnuah Aston Villa chuan chak ni hmel an hmu ve leh ta a, an manager hlui Steve Bruce kaihhruai Newcastle United chu 2-0 in an lo hneh.

Thawhṭannni zan Villa Park-a inkhelah Aston Villa tan hian Conor Hourihane (32') leh Anwar El Ghazi (36') ten goal an khung a, mikhual lamin a chhan letna an neih loh avangin point thum hlu tak an hlawh chhuak.

Newcastle United defender DeAndre Yedlin-a'n box pawn chiahah Jack Grealish nam thluin freekick a chawi, midfielder Hourihane chuan kawh zetin a pet lut - keeper Martin Dubravka tan dan hman a ni lo.

Goal luh aṭanga minute li hnu lekah Newcastle bawk an fimkhur lo, centre back Federico Fernandez chuan freekick an chawina hmasa bul lawkah a chawi leh. A pet turin Ireland international Hourihane a rawn ding chhuak a, a ball pet ṭha tak chu El Ghazi-a'n hnai tak aṭangin a khung.

Newcastle lamin si phurh sut theihna hun ṭha nei mah se hliam dam hlim goalkeeper Tom Heaton an paltlang thei lo - Federico Fernandez leh Allan Saint-Maximin te goal khung tur chu ṭha zetin a dansak a ni.

Hnehna changtu Villa hian point 14 hmuin table lamah 15-na dinhmun an luah a, chak nise pakuana dinhmun luah thei Newcastle erawh point an hmuh belh loh avangin 14-naah an awm rih a ngai ta zawk.

Nikum October thla khan Villa chuan an manager Steve Bruce an ban a, khatih lai kha chuan Championship club an la ni. Premier League-a an kaisan hnuah Bruce hi Newcastle manager a lo ni leh tawh thung a, a vawi khat nan Villa Park-ah hian a kir.

English manager hi Villa fans lam chuan ṭha takin an lo dawngsawng a, an club tana a hnathawh tawhte avangin an ban hnu ni mah se zah takin an lo dawngsawng. Bruce hian a naute a remkhawm ṭha a, mahse an vannei tawk lo.

Goal lut loa an inhnehtawk laiin England keeper Heaton-a'n Jonjo Shelvey freekick a dansak chu 'save' ṭha zinga chhiar tel theih a ni. Heaton hian hnai tak aṭanga Fernandez ball tauh a nam chhuah bakah Saint-Maximin leh Isaac Hayden khung tur chu ṭha takin a dang bawk.

Aston Villa manager Dean Smith chuan, "Premier League hi league harsa tak chu a ni chiang hle. Manchester City leh Liverpool te kan hmachhawn tawh, kan match lehpekah chuan Manchester United kan tlawh a ngai dawn.

"Team lian kara awmte pawh kan inkhel tawk em em vek a, mahni elpui laka point thum hlawh chhuah theih hi a hlu hle a ni. Inelna hi a hautak chho zel dawn tih kan chiang a, mahse kan thawhhona a ṭhain rilru put hmang a dik bawk avangin beiseina a sang," a ti.

Newcastle manager Steve Bruce chuan, "Hun chanve hma lamah khan ball kan chang hnem tawk lo, chuti chung chuan freekick vawi hnih kan chawi khan mi ti chhe deuh tih mai loh chu sawisel tur dang a awm meuh bik lo.

"Ka naute khan an khel chhe lo, huaisen takin point hmuh tumin kan bei let ve bawk. Mahse, keeper Tom Heaton chetṭhat ni kan tawn fuh avangin kan tan chuan thil kha a harsat phah a ni," tiin a sawi.