AFC mikhual tur Bagan-in player an la hraw

I League match hmasa ber chu tun Inrinni tlai dar 2:00 hian RG Stadium, Mualpuiah Aizawl FC leh Mohun Bagan ten an khel dawn. Kolkata club lian hian ṭum dang ang thoin champion an tum a, an ze ngai chhuahin sum hman tamah an ṭuan.

I League champion lai chu Chennai City an ni a, season liam ta khan Akbar Nawas kaihhruaina hnuaiah Spanish player pali Roberto Eslava, Nestor Gordillo, Pedro Manzi leh Sandro Rodriguez te an lalut a, foreigner ṭhat zarah an champion tiin a sawi theih.

Mohun Bagan-in season liam ta khan ram paruk aṭangin foreigner paruk an la a, an player lakte hi I League tawnhriat nei ṭha Aser Pierrick Dipanda, Sony Norde, Yuta Kinowaki, Kingsley Obumneme leh Henry Kisekka te an ni. India rama tawnhriat nei lo ber Egyptian Omar Elhussieny lah sulhnu nei ṭha ber ang hiala ngaih theih a ni.

Amaherawhchu Mariners hian pangana dinhmun an hauh pha ṭawk a, tun season-ah Chennai City kalphung zul zuiin Spain aṭangin player panga an lalut. Heng player enkawl tur hian Polish club ṭha Legia Warsaw pawh enkawl tawh Kibu Vicuna an lalut a, sum an seng hnem tih chu a chiang nghal hle.

Bagan foreigner zinga Spanish ni lo awm chhun Daneil Cyrus hi kum 28 chauh a ni chungin Trinidad and Tobago tan match 89 a khel tawh a, 6 ft 3.5 in zeta sang a nih bawk avangin defender rinawm tak a nih a rinawm. MLS club Chicago Fire tan pawha khel tawh Cyrus kawppui tur hian Spanish defender Fran Morante a awm a, ani pawh hi feet ruka sang a ni.

Tlarhnung pui turin Spanish defensive midfielder Fran Gonzalez a awm a, ani hi Deportivo de La Coruna leh Real Zaragoza B Team vela tal tawh a nih avangin I League-ah chuan a rintlak khawp ang. Goal nawr turin attacking midfielder Joseba Beita leh winger Julen Colinas te an awm a, anni hi Real Sociedad B team tan an khel dun tawh. 

Striker ṭha Salva Chamorro an la kawl cheu, Spanish player panga zingah sulhnu a nei ṭha ber hial ang. Chamorro hi Villarreal academy chhuak a ni a, senior team-ah khel pha lo mah se C team leh B team tan goal a khung nual. A chanchina Mizote ngaihsan ber tur erawh Barcelona B team tana a khelh tawhna hi a ni thung ang.

I League-ah foreigner panga starting eleven-ah a chhawr theih a, eng ang chiaha ṭha nge an nih tih chu Aizawl FC hmaah fiahin a awm dawn.

Mohun Bagan hian India player ṭha pawh an lalut a, an hmelma East Bengal aṭanga Lalramchullova an lalut hi Kolkata football titi tling pha a ni. Chullova bakah hian Mizo defender Lalchhawnkima leh midfielder Lalramzauva te an nei bawk a, squad-ah an awm vek ang tih erawh a chiang lo thung.

Chullova elpui turin Aizawl FC champion puitu zinga mi Ashutosh Mehta an lalut a, mual veilama awm turin Dhanachandra Singh leh Gurjinder Kumar te an awm. Left back-a bul ṭan zawk hi captain tur an ni ang. Goalkeeper-ah Shilton Paul leh Debjit Majumder te an kawl a, keeper ṭha pahnih ai hian kum lama naupang zawk Sankar Roy-a’n bul a ṭan thei bawk. Bagan hi an player neih dan aṭangin tlarhnung an ngai pawimawh tih a lang a, chutihrualin tlarhmaah foreigner ṭha an kawl avangin an goal nawr a na tura ngaih a ni.

Indian Super League aiin I League dah hniam ni tawh mah se India ram club upa pahnih Mohun Bagan leh East Bengal an awm miau avangin inelna hi dah hniam theih a ni lo. Tun ṭumah hian Kolkata club lian pahnih zinga I League nomawi chawi tawh zawk Mariners an rawn zin dawn a ni a, football ngainatute tan chuan en a manhla khawp ang.