BBC Sports award dawng thei zingah Sterling

Khawthlang media house lian ber pawl BBC chuan Sports Personality of the Year award dawng thei tur hming paruk chu Thawhṭanni zan khan an puang a, chawimawina dawng thei zingah Raheem Sterling a tel. 

Manchester City forward bakah hian kum 23 mi hmeichhe tlan chak Dina Asher-Smith, heptathlon star Katarina Johnson-Thompson, cricketer Ben Stokes, Formula 1 driver Lewis Hamilton leh rugby player Alun Wyn Jones-te chu lawmman dawng thei tur hian chhawpchhuah an ni. 

Kum 23 mi Asher-Smith hian Doha-a World Championships-ah 200m-ah gold lain British hmeichhia khawvel huap sprint title la hmasa ber a ni a, he inelnaah vek hian Johnson-Thompson chuan national record siamin heptathlon-ah gold a la ve bawk. 

Ben Stokes-a'n Cricket World Cup-ah England a champion pui a, Hamilton-a'n a vawi ruk nan Formula 1 nomawi a chawi a, Alun Wyn Jones-a'n Wales rugby team chu Grand Slam winner a nihpui a, Sterling-a'n City tan domestic treble nomawi a chawi bakah vunrawng inthliarna dona kawnga hma a lak nasat avangin fak a hlawh hle. 

Aberdeen, Scotland-ah December 15 khian he chawimawina hi semchhuah tur a ni a, a rual hian Greatest Sporting Moment, World Sport Star of the Year, Helen Rollason Award, Unsung Hero, Coach of the Year, Team of the Year leh Lifetime Achievement Award te sem a ni dawn a, kum 18 mi hmeichhe boxer Caroline Dubois chu  BBC Young Sports Personality of the Year atan thlan a ni fel der tawh.