Ban tawk thei Favre leh Valverde

Nou Camp-ah zanin dar 1:30 hian Barcelona leh Borussia Dortmund te an inkhel dawn. German chanchinbu BILD chuan German club an chak lo a nih chuan an manager Lucien Favre an ban dawn tiin an ziak a, Barca manager Ernesto Valverde pawh ngaih ṭha taka awm tur a ni bik lo.

Champions League group F inkhel dangah Inter Milan-in table mawngphaha awm Slavia Prague an tlawh dawn. Antonio Conte hote hian knockout stage lut turin beiseina an la nei a, tun dinhmuna pakhatna Barcelona hi tla thei an la ni.

Borussia Dortmund hi tun hmain sum vangin an talbuai tawh a, an hmelma Bayern Munich puihna an mamawh hial. Tunah erawh an sum dinhmun a ṭha a, kum khat chhunga sum chevel pawh euro maktaduai 490 a ni a, an hlawkna pawh euro maktaduai 18 bawr vel a ni pha.

Amaherawhchu, Bayern-in an khelh ṭhat loh vangin an manager Niko Kovac an ban phah a, Dortmund hian an hmelma che chhia hi an la tluk pha lo. Favre hote hian Hans-Dieter Flick (manager lailawk) hnuaia khel Bayern chu 4-0 in an hneh lo.

Kar liam ta khan table mawngphaha awm Paderborn lakah first half-ah 3-0 in an hnufual a, buaina a awm tih a chiang. Chutihrualin second half-ah Dortmund hian an siphurh an sut zawh avangin Favre hi 'chance' dang an pe lehah a ngaih theih. German club hian sum an hman tam avangin Swiss manager chungah hian zahngaihna lantir reng an tum ta lo niin a lang a, Barcelona laka an chak loh chuan an ban dawn tih thuthang hi a dik a rinawm hle.

Bayern Munich an hneh loh ṭumin Favre-a'n first half-ah Jadon Sancho a thlak a, club lamin tun hnaiah an chhan tawk loah ngaiin English winger hian chhuah a hnial lo tih thawm a awm. Kum 19 mi Sancho la thei tura ngaihte chu Manchester United, Barcelona, Liverpool, Chelsea leh Real Madrid te an ni a, Dortmund aia club lian zawka ngaih vek an nih avangin hmabak nei êng tak player hi a man an beisei aia tlawmin an chan thei.

Chutihrualin Barcelona an hneh chuan boruak a danglam dawn a, team boruak ṭhat nan Borussia Dortmund tan Nou Camp-a chak a pawimawh takzet.

Lionel Messi telna Barcelona pawhin tun hma a phak tawh lo a, La Liga-ah hmahruaitu ni mah se point 39 hmuh theih aṭangin point 28 chauh an hmu tih hriat a ṭha. Dortmund lakah hian hrem vangin Gerard Pique a khel thei dawn lo a, Clement Lenglet a dam tawh avangin thlakna turah buaina a awm lo. Amaherawhchu Catalan club hian an match hnuhnung berah Inter Milan hmachhawn turin San Siro an tlawh dawn a, match hnuhnung pahniha an chak lo a nih chuan an tla dawn.

Conte enkawl Inter hian point li chauh la hmu mah se match hnih khelh hmabakah an chak ve ve chuan point 10 an hmu dawn. Italian club-in beiseina sang tak an la neih avangin Dortmund leh Barca inkhel hi a nung sawt ang.