Euro atan Russia dinhmun a derthawng?

Russia rama infiam miten damdawi hman phal loh an hman chuan nghawng a la nei lian chho zel a, tun hnaia thu thar berah chuan nakkuma Euro 2020 an thlen tur chu thleng lo thut thei dinhmunah an ding mek!

Damdawi hman phal loh an hmang nge hmang lo tih endiktu pawl lian World Anti-Doping Agency (WADA) hnuaia awm Compliance Review Committee (CRC) chuan Russia hi kum li chhung atana hrem an duh a, a hrem theitu erawh an ni lo thung.

Euro 2020 thlen leh thlen loh chungchangah chuan UEFA thuneihna a ni dawn a, nakkum nipui laia neih tur a nih tawh avangin hun tepter tawh takah chuan an sawn loh a rinawm tawh mah zawk - thu chiang erawh a la awm lo.

Russia hi an ram sorkar hriatpuina ngeiin an infiammite chuan damdawi hman phal loh an hmang tih hmuhchhuah a ni a, a hnu lamah endik tura an tih hnuin Moscow khawpuia laboratory-a an data (zun leh thisen test tawh sa) te chu tih chhiat a ni.

Rio Olympic leh 2018 Winter Games-ah te khan Russia infiammite hi an ram hminga tel khap an lo ni tawh, nakkuma neih tur Tokyo Olympic atan pawh hrem chhunzawm theih tur an ni. Tunah chuan Euro C'ship-ah pawh nghawng awm theih dan a awm a, Russia buaina a punlun chho zel.