Vawiinah MPL Judgement Day

Vawiin hian Mizoram Premier League Season 8 semifinal khel tur a hriat dawn a, relegate tur a chiang dawn bawk. Tlai dar 2:30-ah Chanmari FC leh Ramhlun North te an inkhel dawn a, he inkhel zawh hian chhanna hmuh nghal theih a nih avangin inkhel tur hi a pawimawh takzet.

MPL ṭantirh aṭanga team ṭha zinga chhiar tel Chanmari FC hian knockout out stage awm ṭantirh aṭangin an la lut ziah a, tun season-ah erawh a vawi khat nan semifinal khel lo thei dinhmunah an ding. Ramhlun North dinhmun a chhe lehzual - an chak zo lo a nih chuan MPL aṭangin an tla ang.

Chanmari FC tana MPL-a goal khung hmasa ber chu Rochhingpuia a ni a, Chhinga hian an veng club hi la chhuahsan ngai lo mah se tun season MPL-ah hna vangin a la inlan lo. Chutihrualin MPL ṭan hmain Chanmari hi Chhinga hoin CYMA Football-ah an champion a, an fapa rangkachak hi best player a thlan a ni. Chanmari FC pawhin Chhinga thiamna an chhawr zui a, MFA Super Cup final an thlenna kawngah player a ṭangkai hle.

MPL-ah Chhinga awm loh a lan avangin Chanmari FC-in Godwin Quashiga la a, Ghanian midfielder telin result ṭha neih an harsat bakah Ramhlun North nen hian an foreigner an chhawr thei dawn lo. Amaherawhchu Chanmari FC-in chanchin lawmawm an nei a, match pawimawh bikah Chhinga a rawn let dawn.

Chanmari FC manager Lalhmangaiha Sailo (Angaiha) chuan, "Club dang result-ah chuan kan innghat tehmeuh mai a, chutihrualin kan chak phawt chuan beisei tur a awm. Kan inkhelh zawha beiseina kan neih chhunzawm theih nan chak ngei kan tum. Godwin tih loh chu an dam ṭha a, Chhinga kan chhawr thei dawn bawk a, chak ngei pawh kan inbeisei," tiin Vanglaini a hrilh.

Chanmari ang thoa chak mamawh chu Ramhlun North an ni a, anni hian an elpui Chawnpui FC ṭum hnih an hneh tih loh chu chak an nei lo. RNFC hian second phase-ah Chhinga Veng, FC Venghnuai leh Electric Veng an chelh thei a, an tum ram an thleng pha lo a nih pawhin Chanmari FC beiseina titawp turin theihna an nei tih chu a chiang a ni.