Electric Veng hun a inher dawn?

Season liam ta khan Electric Vengin a vawi khat nan MPL an khel a, round 14-naah panganaah an tlak avangin semifinal an khel pha lo. Tun season-ah Lalsangzuala Hmar lalutin knockout stage khel turin point khat chiah an mamawh tawh a, zanin dar 7:30 hian FC Venghnuai an hmachhawn dawn.

Electric Vengin an match hnuhnung berah season ṭantirh lama an hneh loh Chhinga Veng chu 3-1 in an hneh a, team boruak a ṭhat chhoh leh tawh avangin FC Venghnuai lakah a buk rit zawk an ni ang. Chutihrualin Rindika Hmar enkawl MPL kaithar hian an match hnuhnung berah Chawnpui FC an hneh loh avangin relegate emaw relegation playoff khel thei an ni a, tha thlah thei an ni lo. I Day Football-a final thlenpuitu Vanlalthanga'n a theihna a pholang leh tawh bawk.

Venghnuai elpui Chawnpui FC leh Ramhlun North chak lo ve ve pawh ni se point hmuh hrim hrim an mamawh avangin Electric Veng semifinal kawng daltu nih chu an châk zawng tak a ni ang. MPL kaitharin Venghnuai mipui puihnna an mamawh a, Electric Veng mipui tan Lammual pan loh phal chi a ni lo ang.