Real leh PSG an tlang

Thawhlehni zan Champions League inkhel hmuhnawmah Real Madrid leh Paris St-Germain chu 2-2 in an inhnehtawk a, group A aṭangin team pahnih hi last 16 khel turin an tling. 

Real Madrid tan striker 'form' em em mai Karim Benzema chuan goal hnih a khung a, Santiago Bernabeu-ah minute 80 chhung chu Real-in 2-0 in hma an hruai. Mahse, PSG-in last 16 lut chiang dawn tho mah se Real laka tlawm an duh lo a, minute 80 hnu lamah goal hnih an rawn khung - Kylian Mbappe chuan minute 81-naah si phurh a rawn sut ṭhen a, minute hnih hnuah Pablo Sarabia chuan a rawn sut zo. 

Hun tawp thlengin goal dang a lut lo a, team pahnih an tlang - Gareth Bale chuan a hming chherna remchang nei mah se freekick ṭha tak hmangin post a tih per a, a vanduai. Inkhel tawpa sawi hlawh ta ber chu Karim Benzema a ni. French striker hian Champions League-ah goal 64 ngawt a khung tling ta. 

Kum 31 mi Benzema hian CL-a goal khung hnem lamah Cristiano Ronaldo (127), Lionel Messi (113) leh Raul Gonzalez (71) chiah tluk loh a nei tawh a, pangana Robert Lewandowski (63) a hla lo viau bawk. Group A inkhel dangah Galatasaray leh Club Brugge chu 1-1 in an inhnehtawk a, inkhel boruak 'hot'-ah hian Brugge player pahnih chu injury time-ah hnawhchhuah an ni. 

Belgian club Brugge tan hian Krepin Diatta chuan Galatasaray tana Adem Buyuk goal khung chu injury time-ah a sut a, a goal khung a lawmna lamah a kawr a phelh - yellow card a lo hmuh tawh si avangin hnawhchhuah a ni!

Diatta goal khung tur assist tu Clinton Mata pawh a phur fal mah mah a, goal khung lawmna lamah corner flag a pet bung a, a yellow card pahnihna pek niin hnawhchhuah a ni bawk!