United senior team atan Max Taylor an ko

Manchester United manager Ole Gunnar Solskjaer chuan Europa League khel turin player naupang rual a zin pui a, zanin dar 9:20-a Astana hmachhawn tur team-ah defender Max Taylor chu koh tel a ni.

Premier League lama talbuai mek Arsenal pawhin zanin dar 1:30 hian Eintracht Frankfurt an mikhual dawn, manager Unai Emery naute hian point an hlawh chhuak a nih chuan an tlang chiang nghal ang.

Kazakhstan rama zin turin Solskjaer-a'n player 18 a hruai zinga 14 zet chu kum 20 hnuai lam an ni, an zinga kum 19 mi Taylor hi thla 12 liam ta maia cancer vanga enkawl kha a ni - tunah chuan inkhel turin a inpeih leh tawh.

Taylor hi cancer vanga chemotherapy lak ngai a ni a, mahse tunah chuan a dam tawh. Kumin September thla khan training zawm leh tawhin a hnu lamah Under 23 team tan vawi hnih a inlan; United medical staff lam chuan a dinhmun a ṭhat vek thu an sawi.

United hian Pathianni zanah Aston Villa an hmachhawn lehnghal dawn, Europa League an khelhna tur hi darkar ruk zet Thlawhtheihna hmanga thlawh ngai a nih avangin senior player a hruai lo hi a mak hran lo. First team coach Michael Carrick leh Kieran McKenna te kaihhruaina hnuaiah inbuatsaihna an lo nei thung dawn a ni.

Eintracht Frankfurt leh Vitoria Guimaraes te October 3-a an inkhelh ṭuma buaina chhuak vangin UEFA chuan German club hi a hrem a, Europa League match an khelh leh tur pahnihah an fans hnenah ticket an hralh thei dawn lo.

Arsenal nen an inkhelh hunah Frankfurt hian fans an nei thei dawn lo tihna a ni a, fan tel lo chuan an rama 3-0 ngawta an ngam loh Gunners lakah point thum hlawhchhuah a huphurhawm duh khawp ang.

Security lamin Emirates Stadium chhunga lut tur fans hi uluk takin an endik dawn, hei vang hian North London club chuan an inkhel en tur zawng zawngte chu a hma thei ang bera khelmual lam pan turin an chah hial a ni.

Goalkeepers: Lee Grant (36), 

Matej Kovar (19).

Defenders: Max Taylor (19), Luke Shaw (24), Axel Tuanzebe (22), Teden Mengi (17), Di'Shon Bernard (19), Ethan Laird (18).

Midfielder: Dylan Levitt (19), Ethan Galbraith (18), Arnau Puigmal (18), James Garner (18), Jesse Lingard (26), Tahith Chong (19), Angel Gomes (19).

Forwards: Largie Ramazani (19), D'Mani Bughail-Mellor (19), Mason Greenwood (18).