Juve tan Dybala goal a tawk
Paulo Dybala-a freekick chhuih luh hmangin Juventus chuan an mikhual Ateltico Madrid 1-0 in an hneh a, Italian champion hi Champions League group D-ah hmahruaitu an ni chiang nghal.
Atletico Madrid erawh point sarih chauh an la hmuh avangin an la tlang lo. Spanish club hnungah hian Bayer Leverkusen (6 points) an la awm, German club hian Lokomotiv Moscow 2-0 a hnehin group match hnuhnung ber an khelh hunah Juve hnung zui tur zawk a chiang chauh ang.
Freekick chu
Allianz Stadium-a inkhelah chawlhlawk hma chiahin Atletico defender Mario Hermoso chuan box pawn chiah, mual sir lamah Rodrigo Bentancur laka a foul vangin feekick a chawi.
Freekick pet turin Dybala a rawn ding chhuak, ball awmna hi goalline nen a inhnaih em avangin goal chhunga pet a huphurhawm bakah a pet a rinawm loh. Mahse, Juve forward hian angle zim tak aṭangin kawh zeta pet kum lutin keeper ṭha Jan Oblak tan dan theih a ni lo.
Juve tan hian Cristiano Ronaldo a inlan leh tawh a, Portugal captain hi minute 90 chhung inkhel mah se nidang angin a hlauhawm tawk lo. Arsenal midfielder hlui Aaron Ramsey pawh a hliam a dam tawh - Dybala leh Ronaldo te hnungah dah a ni a, midfielder Miralem Pjanic nen an inkhel dun thei tih an lantir.
Ticket hnuhnung
Atletico Madrid hian an match hnuhnung berah Lokomotiv Moscow an la hmachhawn leh dawn a, midang result ngaichang loa tlang tur chuan point thum an mamawh dawn. Chutihrualin chak lo pawh ni se inkhel dangah Juve-in Leverkusen an hneh chuan an tlang tho ang.
Juve lakah hian goal khung theihna hun an nei. Mahse, substitute Angel Correa-a pet ṭha zet chu defender Matthijs de Ligt chuan a lo dansak a, Chelsea striker hlui Alvaro Morata ball tauh pawh goal ban pawnah chiah a kal, goal hmaah an vannei tawk lo.
Atletico manager Diego Simeone chuan, "Team ropui lakah ṭha takin kan khel, mahse hun ṭha kan insiam hnem ang ai chuan goal hmaah kan hlauhawm tawk lo," a ti. Hliam vangin Diego Costa an chhawr thei rih lo a, Antoine Griezmann thlaktu Joao Felix chu hliam dam kawr a nih avangin bench aṭanga luhtir ni mah se ngai a la awh lo niin a lang.