The Special One a la 'special' reng

Jose Mourinho enkawlna hnuaia Champions League match an khelh hmasak berah Tottenham Hotspur-in round of 16 an lut nghal a, Thawhlehni zan khan Olympiakos lakah comeback ropui an lantir. 

Spurs hian minute 19 chhung lekin goal hnih chhuah mah se an pu Mourinho rilru ang an pu a, huaisen taka beiletin goal liin an chhanglet - hun tawp hamrik a rik meuh chuan 4-2 in Spurs an chak. Mourinho-a'n, "England-a striker ṭha ber," tia a sawi Harry Kane chuan a pu fakna thu chu a takah a chantir a, Greek club lakah goal hnih a khung. 

London club tan Dele Alli leh Serge Aurier te chuan goal khat ve ve an khung bawk a, group B aṭangin Bayern Munich nen last 16 khel turin an inpetkai. 

Mourinho-a'n inkhelh ṭan hmain Spurs chu last 16 a hruai thlen tur thu a sawi a, mahse Tottenham Hotspur Stadium-a Spurs manager nichunga a match hmasa bera minute rukna leka thil thlengin thawnthu dang min hrilh. 

Youssef El-Arabi chuan Spurs fan-te a barakhaih a, mikhual team tan ṭha zetin goal hmahruai a rawn khung. Tottenham an insiamṭha hman lo - minute 19-naah Ruben Semedo chuan corner aṭanga ball kal chu hnai set sawt aṭangin a khung a, 2-0 a ni fel der.

Mourinho chet chhiat changtute nui turin an inpeih at a, Spurs khelh dan hmuh nuam an ti. Mahse, minute 29-naah top coach leh huaisen bik danglamna a lang a, Mourinho-a'n substitution a siam nghal. Defensive midfielder Eric Dier a la chhuak a, attacking midfielder Christian Eriksen a luhtir. First half hun pek belhah Spurs-in an beisei goal an hlawh chhuak ta nge nge a, defender Yassine Meriah chetsual zarzoin Dele Alli-a'n a khung. 

Minute 20 hma lamah tun hnaia Mauricio Pochettino chetsual chhan a lang a, Spurs an talbuai. Mahse, Mourinho-a'n minute 29 chhungin a tuam damna a nei nghal a, second half-ah team ṭha lehzual niin Spurs an rawn inlan bawk. 

Harry Kane-a'n amah ringtu a pu chhanletna hun minute 50-naah a nei a, si phurh a rawn sut zo - Mourinho hnuai match hniha bul la ṭan ve ve Lucas Moura-a siamsak a ni. 

Minute 73-naah Aurier chuan an hmahruaina goal a rawn khung a, Kane-a'n minute li hnuah a goal hnihna hmangin a rawn ti famkim - Olympiakos tan harhna chang Spurs lakah comeback theih a ni tawh lo. Kane hian Champions League match 24-a khelhah goal 20 a khung a, heti zat goal CL-a khung tling tura match mamawh tlem ber ni ṭhin Juventus legend Alessandro del Piero (24) record chu a rawn khum. 

Mourinho-a'n Premier League a lo kir rualin a tihsual tam takah a inzir thu a sawi a, mi inngaitlawm leh thuhnuairawlh mi a nih thu a sawi - a hming lemah 'The Humble One' an ti! Tun thleng chuan a thusawiah Mourinho a dingnghet a, ngeiawm tak leh uchuak taka khingpui tih el a la nei lo - match hnih lek a la kaihruai tih erawh hriat tel a ṭha. Greek club an hneh zawha mak tih hlawh chu Dier hnena ngaihdam a dil thlap kha a ni. 

Game thlak danglam duh vangin Mou hian minute 29-na lekah Dier a la chhuak a, a tisual lo. Portuguese manager chuan, "Kan inkhela harsa ka tih lai ber chu Olympiakos-in goal an rawn khung kha a ni lo a, Dier lakchhuah a ngai kha a ni. 

"Player fing tak, team nihphung man tak a ni a, a khelh chhiat avanga la chhuak ni loin team mamawh dan mil zawkin substitution kha ka siam a ni. Dier hnenah ngaihdam ka dil a, Christian khan kan mamawh min pe a ni," a ti a, Manchester United boss a nih laia a lo rim tawh player chu ngaihdam a dil. 

Kane-a'n si phurh sutna goal a khungna kawngah ball boy-in tha a thawh hlawk a, Serge Aurier chu rang taka ball a lo pek avangin Ivorian right back 'throw-in' aṭanga ball kal chu Kane-a'n si phurh sut nan a hman theih phah. 

Mourinho chuan, "Ka naupan lai ang maia naupang fing te hi chu ka ngaina a, keipawh ka naupan lai chuan ball boy ṭha tak ka ni ṭhin. Kha naupang kha a che fing takzet a, a sira lo ṭhu satliah mai loin game kha a khel ve a ni," a ti a, Kane-a'n goal a khung khan Mou hian he ball boy hi a kuah!

Portuguese manager chuan, "Dressing room-ah sawm ka tum a, mahse a lo kal bo hman a ni," a ti zui a, a hlim hle - Mourinho hnathawh ropui tak pakhat chu team boruak siamṭhat hna a thawk tel hi a ni a, tun season-a beisei phak lo Alli pawhin ngai a awh leh ṭan. 

"Alli-i nih chuan Dele Alli khelh angin khel ang che," tia a hrilh player hian West Ham lakah a theihna a pholang tawh a, Champions League-ah pawh a khel ṭha lehpek hle - Spurs an hmuhnawm dawn chauh.