MPL9 khel tur FC Bethlehem

'Nazareth tlangval Bethlehem khuaa piang kha min hruaitu a ni' ti ṭhintu FC Bethlehem chuan Kanan FC hnehin Mizoram chhunga football inelna sang ber Mizoram Premier League khel turin an tling.

Nimin MPL9 Qualifier second leg inkhel nung ṭha takah FC Bethlehem tan Lalnunzira Sailo leh F. Lalnuntluanga ten goal an khung a, first leg-ah goal a luh loh avangin aggregate-ah 2-0 in an chak. Kanan FC erawh MPL khel turin playoff-ah MPL8 pasarihna an hneh a ṭul dawn a ni.

FC Bethlehem leh Kanan FC hi Aizawl DFA hnuaia first division club an ni a, MPL qualifier-a an inhmachhawn hma hian league-ah 2-2 in an inhnehtawk. FCB hi pathumna an ni a, Kanan hi pahnihna an ni thung. Semifinal-ah inhmachhawnin Chawnthansanga enkawl Kanan FC hi 2-1 in an chak a, an champion zui bawk.

Bethlehem erawhin final lut pha lo mah se finalist Aizawl FC Academy-in qualifier an khelh theih loh avangin Aizawl DFA aiawhin an tel ta tho. Kanan nen bawk FCB hi an inhmachhawn a, first leg-ah 0-0 a ni.

Second leg-ah FCB-in goal an khung hmasak an hmang ṭangkai. Minute 41-naah V. Lalruatsanga ball vawrh chu substitute F. Lalnuntluanga'n (Tluangtea) changin K. Vanlalhriatzuala tan a pe a, ani hian lo flick zeuhin Nunzira'n petna tur khawp mawi zeta a insiam kuak hnuah a pet goal chiang hle.

Second half-ah Kanan FC-in ball chang tam hret mah se goal khungtu erawh Bethlehem tho an ni a, Lalnunzira (Zirtea) ball pek chu Tluangtea'n minute 65-naah chak nemngheh nan goal-ah a chantir a, goal a luh belh tawh lo. A hunah tak FC Bethlehem an chak a, Mizoram Premier League khel turin an tling.

FC Bethlehem secretary Lalruakima Pachuau (B-a) chuan, "Kan lawm khawp mai. MPL awm ṭantirh aṭanga kan dream kan tihlawhtling a, kan vai thawhrim rah vek a ni," tiin an club chanchin lawmawm chungchang Vanglaini a hrilh.

Ruata chuan sawi chhun-zawmin, "Kum 2002 khan kan club hi din ṭan a ni a, club dinhmun hniam ber lai pawha beidawng loa club lo enkawl tawhtu, hruaitu lo nih tawh zawng zawng te thawhrah a ni. Tun ṭuma coach leh player-te zawng zawng chungah kan lawm takzet a. Sum faia min puitu kan veng Local Council leh vengchhung mimal ṭhahnemngaia thawhlawm thawhtute zawng zawng chungah kan lawm takzet bawk a ni," tiin vengchhung ṭanrual rah a ni thu a sawi.

FC Bethlehem hi kum 2002 khan din a ni a, South Zone hnuaiah awmin final thlen chang nei bawk mah se nomawi chawi turin kum kua an nghak. Kum 2011 khan Third division-ah an champion a, kum 2012-a MPL ṭan a nih kum khan second division khel turin an in pet tling.

Second division-ah nomawi chawi ṭumte nei bawk mah se First division khel tura inpet tlin an harsat hle. 2017-18 season khan James Lalnunsanga Sailo (NS-a) enkawlna hnuaiah Second division season opening leh closing-ah an champion a, first division khel turin an tling.

First division-a an awm kum khatnaah hian NS-a hnuaiah awmin league-ah palina an ni a, semifinal lutin Aizawl FC Academy 2-1 in an hneh lo. Qualifier-ah AFC Academy khel thei lo mah se league-ah palina an nih avangin an tel pha lo.

Tun season-ah MPL-a player anga tawnhriat nei ṭha B. Zoramthara enkawlna hnuaiah Mizoram football inelna sang ber khel turin an tling a, kum 17-a upa FC Bethlehem tan chanchin duhawm a ni.