Ramhlun North an relegate

Nimin tlai inkhelah Chanmari FC-in Ramhlun North 5-0 in an sawp a, Mizoram Premier League aṭangin RNFC an tla. 

Chanmari FC manager Lalhmangaiha Sailo chuan, "Kan chungah engpawh a thleng thei a, Ramhlun North hneh hi kan tih theih awmchhun a ni," tiin Vanglaini a hrilh lawk a, nimin Lammual inkhel pawh an thunun hneh hle.

MPL5 champion tan hian Thomas Lalengkima, Lalremruata, Lalnunzama, K. Roluahpuia leh Rochhingpuia ten goal khat ṭheuh an khung a, Ramhlun North-in goal zawnah vawi khat chauh an pet avangin chak phu zawkin hnehna an chang.

Nizan inkhela FC Venghnuaiin Electric Veng an hneh chuan Chanmari hian semifinal an lut dawn a, result kan hriat hman loh avangin CFC dinhmun kan hre hman lo. MPL tihlutu zinga mi Ramhlun North hi MPL5 Qualifier-ah pakhatna niin kum 2016 khan Mizorama football inelna sang ber khel turin an tling. MPL an khelh hmasak berah Ramhlun North hi pasarihna an ni a, relegation playoff khelin MPL an khelh chhunzawm.

MPL6-ah Ramhlun North-in an thlen san ber ṭum an tawng a, palina Chanmari FC nen an point hmuh zat inang mah se head to head-ah an tluk loh avangin knockout stage an lut lo chiah chiah. MPL7-ah Ramhlun North pasarihnaah an awm nawn a, relegation playoff hmangin MPL khel leh mah se tun season-ah chuan an inhamtang thei ta lo. MPL ngainatute chuan Ramhlun North-in MPL club an nih hnua I Day Football final-a Aizawl FC an barakhaih ṭep te leh Chhinga Veng nena an 'rivalry' ngaihnawm tak chu an hre reng ang.