Manchester City leh Mumbai inzawm

Premier League champion Manchester City neitu City Football Group chuan an lal ram an zauh zel a, Indian Super League club Mumbai City-ah 65% share an lei ve leh ta - Bollywood actor lar Ranbir Kapoor leh accountant Bimal Parekh ten 35% share an la neih chhunzawm dawn a ni.

City Football Group chairman Khaldoon Al Mubarak chuan, "Kan hmalakna hian Mumbai City, CFG leh Indian football tan hmasawnna a thlen kan beisei a, he club-in hma a sawn zel theih nan theihtawp kan chhuah nghal dawn a ni," an ti. 

CFG hian Manchester City bakah MLS club New York City, A League club Melbourne City, Uruguayan Primera División club Club Atlético Torque, China League Two club Sichuan Jiuniu, J-League club Yokohama F. Marinos leh La Liga club Girona-ah te neitu nihna an nei a, an group hlut zawng hi dollar tluklehdingawn 4.8 a tling. 

Mumbai City hian Nilaini zan khan NorthEast United chu Indian Super League-ah an lenchilh a, 2-2 in an inhnehtawk. Highlanders tana Panagiotis Triadis goal hmahruai chu Mumbai-in Amine Chermiti goal hnih hmangin chhanglet mah se Asamoah Gyan chuan NorthEast United tan a khung ve leh a, 2-2 in an ṭin. 

NorthEast United tan K. Lalṭhathanga chu bench aṭanga luhtir a ni a, Lalengmawia erawh bench lamah hun a hmang tluan thung.