I League ṭan nan ni 2 chiah a awm tawh

Aizawl FC chuan tun Inrinni November 30 hian RG Stadium-ah India ram club ṭha Mohun Bagan an mikhual dawn a, Mizo club inkhel en man hi cheng 50 leh 100 man niin RAW DIGITAL, Zarkawt (Near Vanglaini office) leh Din Din Pharmacy, Khatla kawnah lei theih a ni.

Mohun Bagan hian I League champion nih ngei tumin Spanish coach Kibu Vicuna an lalut a, foreigner paruk lak theih zinga panga chu Spanish player an ni. Mariners kawr nen Fran Morante, Salva Chamorro, Joseba Beitia, Fran González leh Julen Colinas te inkhel RG Stadium-ah en tur a awm dawn a, Trinidad and Tobago international Daneil Cyrus an la nei cheu bawk.

Aizawl FC-in MPL-a foreigner an neih sa Alfred Kemah Jaryan leh Richard Kassaga bakah I League champion nomawi chawipuitu Eze Kingsley Obumneme leh William Lalnunfela te chu Bagan aṭangin an lalet.

Mizo club hian Abdoulaye Kanoute an lalut leh tawh a, Malian striker hi feet ruk leh inches thuma sang niin Lebanon club Bourj FC leh Nigeria club Rivers United tana khel ṭhin a ni a. India ramah pawh tawnhriat a nei tawh a, Goan club Churchill Brothers tan a khel tawh a ni.

Aizawl FC hian foreigner pahnih an la la thei a, pakhat dang hi an lalut hnai bawk. AFC coach Standly Rosario chuan, "I League-ah Mizo club pakhat chiah a awm. Aizawl FC hian Mizoram a ti hmingṭha tawh ṭhin a, Mizo mipui ṭan hi a phu a, a mamawh bawk. Mizo mipuite Mohun Bagan nena kan inkhelh hunah min ṭawiawm turin kan ngen a ni," tiin Vanglaini a hrilh.