Chelsea leh Valencia inhnehtawk

Premier League club Chelsea-in Champions League last 16 an luh dawn leh dawn loh hre turin group stage match tawp ber an nghah a la ngai a, Nilaini zan khan an mikhualna ramah Valencia chu 2-2 in an inhnehtawkpui. 

Inkhel ṭan aṭanga minute 40-na lekah Carlos Soler chuan Valencia tan goal hmahruai a khung a, Chelsea tan midfielder Mateo Kovacic chuan a chhanglet. Minute 50-naa Christian Pulisic goal a luhin Chelsea hi an tlang mai dawn niin a lang hman a, vanneihna chu an lam ṭang niawm rengin Kepa Arrizabalaga chuan Daniel Parejo-a penalty a dang bawk. 

Mahse, chak tura ngaih an nih tawh hnuah Blues an vanduai a, minute 82-naa Daniel Wass ball cross tur nia lang chu goal-ah a lut daih - Kepa-a'n ball kal dan a chhut sual a, chutihrualin Wass hian 'shot' tum a nih bik loh avangin Blues keeper dem theih a ni lo. 

Chelsea hian an match tawp berah Lille an hneh chuan knockout round an lut dawn a, Valencia-in last 16 lut turin Ajax hneh an mamawh dawn bawk. Blues striker Tammy Abraham chu hliam vanga lakchhuah ngai mah se a hliam hi ngaihtuahawm a ni lo a, English striker chuan, "Chiang takin sawi theih la ni lo mah se a tira kan hlauhthawn ang a ni lo," tiin a sawi.