Golden Boy 'Joao Felix ' a hlu

Atletico Madrid forward Joao Felix chu Europe-a kum 21 hnuai lam footballer ṭha berah thlan a ni a, Golden Boy award chu Portugal international hnenah hian hlan a ni. 

Kum 20 mi forward hian season hmasa khan Benfica tan inelna hrang hrangah goal 18 a khung a, nipui transfer lai khan Atletico chu pound maktaduai 113-in a zawm. Felix-a hnuaiah hian kum 19 mi Borussia Dortmund winger Jadon Sancho chu pahnihna a ni a, kum 20 mi Bayer Leverkusen midfielder Kai Havertz chu pathumna a ni thung. 

Portugal tana vawi li inlan tawh Felix chuan, "Ka lawm takzet a, Atletico player zinga he chawimawina dawng thei pahnihna ka ni hian minti hlim lehzual a ni," a ti. Kum 2007 khan Sergio Aguero chuan Atletico Madrid tana a khelh laiin he chawimawina hi a lo dawng tawh a, kum 12 liam hnuah Atletico player dangin a hnung an rawn zui ve leh ta. 

Joao Felix hian Atletico a pan hnuah inelna hrang hrangah match 13 a khel a, goal thum khungsak tawhin assist vawi khat a nei. 

Kum 2003 aṭang khan Italian chanchinbu lar Tuttosport chuan Europe-a kum 21 hnuai lam player ṭha ber thlan nan Golden Boy chawimawina hi a sem chhuak a, player-te hian top flight football an khelh ngei a ngai thung. Nikum khan a hunlaia Ajax defender Matthijs de Ligt chuan he chawimawina hi a dawng a, kum 2017 khan Kylian Mbappe chuan a lo dawng tawh bawk. 

Golden Boy chawimawina hi kum 2003 khan Dutch midfielder Rafael van der Vaart chuan a dawng a, he chawimawina dawng hmasa ber a ni. 

Golden Boy chawimawina dawng zingah Lionel Messi, Wayne Rooney, Cesc Fàbregas, Aguero, Raheem Sterling, Mbappe leh De Ligt te chu beisei anga khel chhuak zuia sawi theih an ni. Hetihlai hian Rafael van der Vaart, Mario Balotelli,  Mario Gotze, Isco, Paul Pogba leh Anthony Martial te chuan career pangngai tak an hmang zui. 

Manchester United mifielder hlui Anderson, Alexandre Pato leh Renato Sanches te erawh beisei phak lo tawpa chhiar theih an ni a, Pato bik hi hliamin a tihbuai vang a ni pakhat.