Point 33,000 nei tling thei James

LeBron James chu player ropui bik a ni chhunzawm zel. James hi basketball inelna sang ber NBA huanga point 33,000 nei tling thei pali zingah a tel ta, nimin zing khan Los Angeles Lakers chu New Orleans Pelicans lakah 114-110 in hnehna a chanpui.

James hian New Orleans Pelicans hmaah hian point 29 a nei a, a pumpuiah point 33,008 zet a nei tawh. James chungah hian Kareem Abdul-Jabbar (38,387 points), Karl Malone (36,928) leh Kobe Bryant (33,643) te an la awm.

NBA champion vawi thum ni tawh James bakah Lakers tan hian Anthony Davis a ropui. American forward hian a club hlui a hmachhawn lehna hmasaah point 41 ngawt a nei a, player ṭha pahnih hi an khel ṭha tluang zel a nih chuan champion tura rinkai zingah an tel ang.

Lakers hian NBA regular season kal laiah match 18 khelh aṭangin vawi 16 ngawt hnehna an chang a, Western Conference hmahruaitu an ni mek. Inrinni zing dar 9:00 hian Washington Wizards an hmachhawn leh dawn a ni.