Napoli chelhtu Reds tan nghah a ngai

European champion Liverpool-in last 16 lut chiang turin Napoli hneh mamawh mah se Italian club hi 1-1 in an inhnehtawkpui hram a, knockout round lut turin group stage match tawp ber an nghah thlen a ngaih phah. Napoli tan Dries Mertens chuan minute 21-na lekah goal hmahruai a khung a, Anfield-ah mualneituin Dejan Lovren hmangin chhanglet mah se goal dang an nei zui lo. 

Group E inkhel dangah Red Bull Salzburg chuan 4-1 in Genk an hneh a, December 10-ah Austrian club hi Liverpool-in group stage-a an match tawp berah an lenchilh dawn. Jurgen Klopp naute hian point khat lek pawh an hlawhchhuah chuan an tlang dawn a, an kutah engkim a la innghat tihna a ni. 

Nilaini zana Liverpool-in Napoli an mikhual hmain an match hnuhnung 13-ah vawi 11 hnehna an chang a, vawi hnih an khingpui an inhnehtawkpui. September 2018 League Cup-a Chelsea an ngam loh hnu khan Anfield-ah an tlawm leh tawh lo a, hetihlai hian Napoli erawh chhungkaw buaina kara match ruk a zawna tlawm tawh an ni. 

Heng zawng zawng ngaihtuahin Reds hi chak tur chiangsaa dah an ni a, mahse ngaih ang ngawt a ni lo. Dries Mertens chuan Liverpool offside trap siam chu bumin angle chep tak kar aṭangin goal hmahruai a khung. Premier League-a team huaisen Liverpool-in beisei an phak lo a, an hat ber ṭum a ni lo - mahse minute 65-naah Lovren chuan si phurh a rawn sut a, Croatian defender hi Reds player ṭha ber tia chhal ngam a ni. 

December a hnai chho a, Club World Cup khel tur Liverpool tan fixture a hautak chho ṭan - ni 36 chhungin match 12 an nei dawn a, chung zinga match hmasa ber chu Napoli hi a ni. Jurgen Klopp-a'n fixture hautak a rilrua dah chungin player a siksawi a, right back-ah Trent Alexander-Arnold aiah Joe Gomez a luhtir - mahse Gomez hian Arnold angin tlarhma a pui ṭha tawk lo a, Klopp a chesual. 

Midfield-ah Fabinho kawppui turin Jordan Henderson leh James Milner a luhtir bawk a, English midfielder pahnih an luhrualin beisei an phak lo ṭhin tih hre turin Klopp hian Liverpool a enkawl rei tawk tawh. Mohamed Salah, Roberto Firmino leh Sadio Mane ten ṭum dang an phak lo a, tlarhnunga inkawprem tak Napoli defence an su hawng zo lo. 

Reds-in vanduaia an inngai a nih chuan James Milner hun neih ṭhat goal ta lo te, Roberto Firmino 'shot' line aṭanga Kalidou Koulibaly-a'n a lo pet hman te chu ui taka an thlir tur a ni ang. Tun season-a Liverpool player pawimawh ber pawl Fabinho chu hliam vanga lakchhuah a ni a, he thu buatsaih a nih thleng hian Brazilian midfielder hmalam hun tur a la hriat theih loh. 

Klopp chuan, "Ka beiseina ka sawi thei lo a, a dinhmun chiah sawi turin a la hma mah mah a ni. Serious tak a nih loh hram ka beisei a, a na neihna hi tuman hliam neih an duh lohna a kerek bawr vel a ni bawk," a ti. Fabinho hian tun season-ah Liverpool tan league match 13 zinga 12-ah bul a ṭan a, Champions League match nga an khelh tawhah bul a ṭan vek bawk!

Norwegian striker Erling Braut Haaland-a'n a thiam tak tak tih a pholan chhunzawm zel a, Genk laka hnehna an channa inkhelah goal a khung - kum 19 mi forward hian tun season-a match 19 a khelh aṭangin goal 27 a khung der tawh!

Haaland hian football legend Alessandro Del Piero (Juventus, 1995-96), Sergei Rebrov (Dynamo Kiev, 1997-98), Neymar (Paris St-Germain, 2017-18), Cristiano Ronaldo (Real Madrid, 2017-18) leh Robert Lewandowski (Bayern Munich, 2019-20) te kiangah a hming a nem kai ta. 

Norwegian striker hi Champions League group stage-a match hmasa pangaa goal khung vek thei zingah a tel - Austrian club tan hian Haaland bakah Patson Daka, Takumi Minamino leh Hwang Hee-chan ten goal khat ṭheuh an khung. 

Salzburg hian match tawp berah Liverpool 1-0 a an hneh chuan an tlang dawn a, hei hi an thlentir thei a nih chuan European football-a 'upset' langsar pawl a ni ang.