Messi 700 - Not Out!

Lionel Messi-a'n Barcelona tan match 700-a khelhnaah goal a khung a, assist vawi hnih a nei bawk - Nilaini zan Champions League inkhelah Barca-in 3-1 in Borussia Dortmund an hneh a, group F aṭanga round of 16 khel turin an tling. 

Messi hian minute 29-na lekah Luis Suarez khung tur a siamsak phawt a, minute li hnuah Argentine forward hian scoresheet-ah a hming nem kaiin a khung ve leh - a la tawp mai lo. Barcelona a pan hnua beisei phak lo Antoine Griezmann chuan minute 67-naah an goal thumna a khung ve leh a, hei pawh Messi siamsak bawk a ni!

Messi hian Barca tan match 700-ah goal 613 a khung tawh a, assist vawi 237 a nei - Champions League ringawta goal a khung tawh zat hi 114 a tling a, a ropui tih loh rual a ni lo. Nomawi 34 a chawi tawh a, Barca tana nomawi chawi belh châkin a la tuihal reng. 

Dortmund manager Lucien Favre-a'n rin loh takin Jadon Sancho chu bench-ah dah mah se minute 45-naa English forward a luhtir hnuin Dortmund an nung sawt a, minute 77-naah an goal neih chhun a khung.