Vawiin tlai dar 2:00-ah Aizawl FC vs Mohun Bagan

India rama football inelna sang I League chu vawiin tlai dar 2:00 aṭangin RG Stadium, Mualpuiah khelh ṭan a ni dawn a, Aizawl FC leh Mohun Bagan  te an inhmachhawn dawn.

Kolkata club Bagan hian champion ngei tumin Spanish coach Kibu Vicuna an lalut a, a chhawr theih turin foreigner paruk an chhawpsak. AFC hi MPL league round-ah pakhatna an ni thung a, mahni muala inkhel tur an nih avangin mipui puihna an dawn ṭhat chuan Mariners hneh thei tur an ni.

AFC coach Standly Rosario chuan, "Aizawl FC hi Mizo mipui ta a ni a, I League-ah Mizo club dang a awm lo. AFC ṭan vek turin Mizo mipui zawng zawng ka ngen takzet. Kan player-te hi player naupang te te an ni hlawm a, Mizo mipui puihna an mamawh hle a ni," tiin Vanglaini a hrilh.

Mohun Bagan hi Aizawl FC an hmachhawn hma hian Calcutta Football League (CFL) leh Durand Cup-ah pahnihna ve ve an ni a, Bangladesh-a inelna Sheikh Kamal International Club Cup-ah semifinal lut bawkin I League hmachhawn turin an inpeih tawh.

Spanish coach Kibu Vicuna chuan, "Club board nen lungsi takin kan duh ang player kan lalut thei a, foreigner chauh ni loin Indian player kan lak danah pawh kan lawm. Mohun Bagan kan ni a, season pum kan thlir a nih chuan champion kan tum. Chutihrualin match khat zel chauh kan thlir a, Aizawl FC lakah point thum hlawhchhuah ngei kan tum," tiin inringtawk takin a sawi.

Mariners hian foreigner paruk an rawn hruai avangin I League danin a phal zat pangain bul an ṭan ngei a rinawm a, danglamna thlen tham an ni ang. Bagan hi Spanish coach hnuaiah set piece-ah an hlauhawm a, Aizawl FC an fimkhur reng a ṭul dawn.

Chutihrualin chanchin ṭha lo lam pawh an nei ve tho. Bagan hian tun season-ah sponsor lian tham an la hmu lo a, club chhung hrechiangin Vanglaini a hrilh danin Mariners foreigner-te hian Thawhlehni training-naah pawh ground an lut lawk lo. Kolkata club-in hlawh pek an intiam hnuah chauh khelmual an lut. Hei bakah hian state pawn club-ten RG Stadium-a khelh an harsat ṭhin a, Bagan hian training vawi khat chauh an nei hman.

Aizawl FC hmachhuan tur chu Mizo rawltharte an ni hlawm dawn. MPL-ah Lengpui tlangval F. Lalremsanga'n goal 10 a khung a, winger ball thiam Isak Vanlalruatfela'n goal li khungin Rochharzela'n goal ruk a khung bawk. Heng player-te hian season liam ta khan I League-ah tawnhriat an nei tawh a, kuminah an hriam zawk ngei a rinawm.

Chutihrualin Standly Rosario hote hian Bagan nen hian goal venhim an ngaih pawimawh a rinawm a, Alfred Kemah Jaryan pawhin MPL-ah goal riat ngawt khung mah se tlarhnung lama Richard Kassaga leh a hote a puih a rinawm. Mariners laka result ṭha nei turin keeper Lalawmpuia leh a hmaa dingte an pawimawh ang.

Mohun Bagan-in Aizawl FC hmachhawn turin Mizo player pathum an neih zingah Lalramchullova chauh an rawn hruai a, Mizo tlangval hian Mariners hi an hmelma East Bengal aṭangin a zawm. Aizawl FC defender hlui Chullova chuan, "East Bengal kha nuam ka ti a, chutihrualin player nih chuan chona thar hmachhawn a ṭul ṭhin. Bagan nen hian sulhnu ṭha tak hnutchhiah ka duh a ni," tiin a sawi.

Goalkeeper : Debjit Majumder, Shilton Paul

Defender : Fran Morante (Spain), Daneil Cyrus (Trinidad & Tobago), Dhanachandra Singh, Ashutosh Mehta, Lalramchullova, Gurjinder Kumar

Midfielder : Fran Gonzalez (Spain), Joseba Beitia (Spain), Sk Sahil, Nongdamba Naorem, Romario Jesuraj, Britto PM

Forward : Salva Chamorro (Spain), Julen Colinas (Spain), Sk Faiaz, VP Suhair