Police-in MPL semifinal khel dawn lo!
Mizoram Football Association-in Ningani zana Mizoram Premier League Season 8 league round khelh zawh rualin, pahnihna dinhmun luahtu Mizoram Police-in BN Mullick Memorial All India Police Football Tournament an khelh dawn avangin MPL semifinal an khel dawn loh tih a puang.
Police khel lo tur hi Chanmari FC tan vanneihna an ni a, MPL vawi hnih champion tawh hian pangana dinhmun hauh chungin semifinal an khel dawn. Chanmarians hian semifinal-ah pakhatna Aizawl FC an hmachhawn ang a, semifinal pakhat zawkah Chhinga Veng FC leh Electric Veng FC te an inkhel thung ang.
MFA chuan, "Mizoram Police FC hi BN Mullick Memorial All India Police Football Tournament khel tura December 4-19, 2019 chhung Kolkata-a an zin a ngaih si avangin MPL semifinal an khelh a remchang dawn ta lo a; he mi chungchangah hian Mizoram Police Sports Control Board aṭanga lehkha lo kalte MPL Board-in a ngaihtuah a, Mizoram Police Sports Control Board hruaitute a kawm bawk a, he thutlukna hi a siam ta a ni," tiin thuchhuah an siam.
Police coach Lalbiaksanga Colney chuan, "Semifinal lut mah ila Kolkata-ah All India Police Meet kan khelh dawn avanga MPL kan khel tawh lo tur hi kan va ui tak em. Police ṭantu tan phei chuan a ho khawp ang. Min hrethiam hram dawn nia. Kan hna, kan eizawnna ber kan khelh a ngai bawk si a, Police Meet kan khelhna turah pawh min ṭawngṭaipui zel dawn nia," tiin MPL semifinal an khel lo tur a ui thu a sawi.
SEMIFINAL
Leg 1 – December 3, Thawhlehni
Aizawl FC Vs Chanmari FC
Leg 1 - December 4, Nilaini
Chhinga Veng Vs Electric Veng
Leg 2 – December 10, Thawhlehni
Electric Veng Vs Chhinga Veng
Leg 2 – December 11, Nilaini
Chanmari FC Vs Aizawl FC
FINAL - December 14, Inrinni