Ruiz-a'n thawnthu ziah danglam a tiam

American-Mexican boxer rothap Andy Ruiz Jr chuan December 7-a Anthony Joshua nen an inhmachhawn leh hunah thawnthu ziah danglam leh a tiam a, an inhnekna tur hmun Saudi Arabia a thleng fel der tawh. 

Kum 30 mi Ruiz hian June khan boxing khawvel barakhaihin Anthony Joshua chu a tukdawl a, WBA, IBF leh WBO heavyweight title a hlawh chhuak. Joshua-a'n phuba lak a tum dawn. Ruiz chuan, "New York-ah khan thawnthu chu her danglamin a thar ka lo ziak tawh a, Saudi Arabia-ah pawh chu thil chu thlentir leh ka tum dawn a ni," tiin a sawi. 

Boxer pahnih inhmachhawn tur hi Middle East-a heavyweight world title fight neih hmasak ber tur a ni a, mi 15,000 lenna Diriyah Arena-ah nghah a ni dawn a ni. He hunah hian British boxer rothap Dillian Whyte pawh a lo kir dawn a, Ruiz leh Joshua te inhnek hmain Mariusz Wach nen heavyweight boxing-ah an inhmachhawn ang. 

Whyte hian July-a Oscar Rivas a hneh hnuah khan ring chhung a la rap leh lo a, kha fight a neih hma khan UK Anti-Doping (UKAD) test paltlang lo mah se a hnuah a inhnek chhunzawm phalsak a ni.