Astana lakah United rawlthar an tlawm

Manchester United rawlthar rual chu Astana lakah 2-1 in an tlawm a, manager Ole Gunnar Solskjaer-a'n chak lo mah se a player naupang zingah hmabak nei eng a hmuh vanga a lawm thu a sawi.

Premier League club dang Wolves chu Portugal rama an feh chhuahna hmunah Braga nen 3-3 in an inhnehtawk. Portuguese club hi group K hmahruaitu an nih chhunzawm a, Nuno Espirito Santo naute pawhin knockout stage an lut chiang ve nghal bawk.

Manchester United hi group L aṭanga tling chiang tawh an nih avangin manager Solskjaer chuan a senior player a hahchawlhtir a, mel 6,000 zeta hla Kazakhstan ramah academy aṭanga zir chhuak rawlthar rual a hruai. Astana laka United tana inkhel bul ṭantute kum chawlh rual chu kum 22 leh ni 26 chauh a ni, European competiton bika inkhel bul ṭantu naupang ber an hman ṭum an tawng hial.

Minute 10-na lekah captain armband hrengtu Jesse Lingard hmangin goal hmahruai an khung ta tho a. Mahse, mualneitu lamin second half-ah Dmitri Shomko hmang an sut bakah United defender Di'Shon Bernard chuan anmahni lamah ti lut palhin 2-1 in an chak.

European club lian leh ṭha te chuan natural grass (phaitual hnim) an hmang a, siam chawp (arificial turf) a inkhelh harsa an ti ṭhin - ball kal dan a danglam bakah player tan intih palh a awlsam bawk. United lenluhna Astana Arena hi siam chawp '4G pitch' an phahna hmun a ni.

Kazakhstan-ah khua a vawt em em a, Nilaini zan khan khaw vawh lam chu -16C te a ni hial. Khawvawt lutuk avang hian stadium chu a chung khuhna hman a ni hial a, group L mawngphaha awm Astana lakah United-in point an hlawh chhuak thei lo.

Man United tan chak loh chhuanlam zawn dawn chuan chhuanlam tur a awm thei ang. Amaherawhchu, an hneh loh Astana hi Europa League match li an khelh tawha point la hmu miah lo an ni - Solskjaer enkawl team an hneh avanga point thum hmu ve chauh an ni.

Manchester United manager Solskjaer chuan, "Player ṭhenkhat hi chuan loan hmanga an chhuahna aṭangin hlawkna an chhar chhuak tih a chiang a, player ṭha tak ni tur chuan khelmuala hun hman tam hi an mamawh a ni. A ṭhenkhat chuan senior team tana khel turin theihna an nei tih pawh an pholang," a ti.

United tan hian right back Ethan Laird, midfielder Dylan Levitt leh centre back Di'Shon Bernard te chuan club tana an match hmasa ber an khel a, an khelh danah manager Solskjaer a lawm. Solskjaer chuan, "Jimmy Garner leh Dylan te kha an khel dun thei tih a chiang a, midfield kan thunun theih chhan pawh an ni. Ethan khan mual ding lam a veng ṭha a, player dangte pawhin an awmna hmunah ṭheuh an hna ṭha takin an thawk," tiin a sawi.

Manchester United hian Pathianni zan dar 10:00-ah Premier League khel turin Aston Villa an mikhual zui leh nghal dawn a, he hunah hian senior player ṭha rual an inlan tawh thung ang. EPL table-ah United hi pakuana niin point 17 an nei mek a, an khingpui tur Villa hi 15-na an ni thung - an inthlauhna erawh point thum chauh a nih avangin an result a zirin team pahnih dinhmun hi nasa takin a danglam duai thei.

Europa League last 32 khel tura inpet kai pakhat zawk Wolves pawh Pathianni zan dar 7:30 hian Shefield United nen an inhmachhawn zui leh nghal dawn. Season kal laiah anni team pahnih hi club lian dangte point chhuhsak thei khawpa ṭha an nih avangin an inkhel hi a hmuhnawm ang.