December: Liverpool hmabak a hautak

Zanin dar 8:30-ah Liverpool-in Premier League match khel turin Brighton & Hove Albion an mikhual dawn a, an match neih leh hmasak ber tur chu December 4 zanah a ni ang a, hna hautak a inṭan chiah bawk ang. 

Reds hian an thiam man an tuar a, league match hautak karah European champion an nih zarah Club World Cup an khel dawn a, League Cup quarterfinal khelh tur an nei bawk. December-ah ringawt Jurgen Klopp-a naute hian match kua an khel dawn a, an tana pawi tak pakhat chu Champions League last 16 lut chiang tura Napoli hneh an mamawh laia an draw kher kha a ni. 

Napoli kha hneh se chuan Red Bull Salzburg an hmachhawn hunah hahdam zawkin an inlan thei tur a ni a, mahse an chak zawh miau loh avangin December-ah league, Champions League, League Cup leh CWC match hautakin a hmuak. 

Liverpool boss Klopp chuan tuna taka an fixtures hautak sawi a duh lo a, Napoli an hneh leh hneh loh chu an fixture ti hautak tu a nih loh thu a sawi. German coach chuan, "He hmunah hian kum li ka awm tawh a, engtiklaiin nge kan fixture a awlsam ngai? Min hrilh teh u. Napoli hneh a, Salzburg laka game awlsam nei turin min beisei a ni mai thei. 

"Mahse, chutin game hi a awlsam ngawt thei ngai lo," a ti a, Salzburg ngaihtuah hmaa Premier League thlir phawt a duh thu a sawi tel nghal. Klopp chuan, "Champions League-ah tum kan nei tak tak a nih chuan Salzburg laka kan pholan a ṭul a, chumi hma chuan Premier League kan ngaihtuah phawt a ṭul thung," a ti a, Brighton lamah a rilru a sawr bing. 

December hi Liverpool fans tan thla duhawm tak a ni thei a, chutihrual chuan ngui taka season an thlir ṭanna thla a ni thei bawk. A êng zawnga thlir chuan Club World Cup champion leh Champions League last 16 lut chungin kumin an khar thei a, Premier League-ah fal takin hma an hruai chhunzawm thei a, League Cup semifinalist an ni thei. 

Mahse, thlirna dang a awm - tun season-a Red fixtures hautak ber thlaa sawi ngamah hian engmah lo maiah CWC a chang thei a, League Cup aṭanga tlak chance a sang a, heng fixtures hautak hian league lama an hmahruaina a pawt hniam duai thei bawk. 

A bik takin CWC leh League Cup inkhel karah darkar 24 chauh hun a awm avangin squad pahnih an hman a ngai dawn a, player chau tawngkhawngin player inhliam thlengin a nghawng 

thei ang. 

Fixtures hautakin Liverpool a hmuak a, thu lawmawm lo chu Fabinho a inhliam. Napoli laka inhliam player hi kuminah Reds tan player pawimawh a ni a, he thu buatsaih thleng hian a dinhmun a la chiang lo. Khawthlang media ten an tarlan dan chuan a tlem berah kar li tal a chawlh a ngaih hmel a, December buai vanglai takin a inlan thei dawn lo tihna a ni. Buaina dang pakhat chu Mohamed Salah dam chiang thei lo hi a ni. 

Salah hian October khan a kerekah hliam a tuar a, Manchester United a hmachhawn theih loh hnuah Genk lakah a kir - Manchester City lakah November 10 khan a inhliam leh a, Napoli lakah inlan mah se ngai a la awh lo tih a khelh danin a pholang. 

Hliam vanga chawl mek Joel Matip-a'n hun a la mamawh tih Klopp-a'n a sawi tawh a, chanchin lawmawm erawh Xherdan Shaqiri-a'n ngai a awh chho thung. 

Liverpool hnaih bertu chu Manchester City an ni a, Pep Guardiola naute hi an thiam em avangin Klopp tan chuan lu haina tham an ni - Reds chetsual an chang reng ang. Mahse, City hi an duh angin thil a kal vek bik lo tih hriat tel a 

ṭha a, an striker pawimawh Sergio Aguero chuan malpui hliam vangin Manchester derby a khel thei dawn lo chiang. 

English football-a derby hot ber pawl hi December 7-ah khelh a ni dawn a, zanin dar 6:00-a Newcastle United an lenchilh hunah pawh Argentine striker a inlan thei dawn lo tihna a ni. Thil chiang taka lang chu match a tam chho a, club ṭhate meuh pawh player hliam vangin an buai ṭan - December-a dingchang club tan nakkum May-a dinchan chance a sang ber ang.