Arsenal manager Emery an ban

Nimin tlai khan Arsenal chuan an manager Unai Emery chu an rawih aṭanga tha 18 hnuah an ban thu an puang a, a hmun ruak hi hnawh khah nghal ni lo mah se assistant coach Freddie Ljungberg chu team enkawl lailawk tura tih a ni.

Arsenal neitu zinga mi Josh Kroenke chuan, "Unai leh a thawhpuite chungah kan club tana an hnathawh avangin lawmthu kan sawi a, kan duh ang min thlenpui tumin theihtawp an chhuah a ni. "Mahse, tun hnaia kan result leh dinhmun thlirin kan mamawh ang min thlen loh avangin thawhhona kan titawp a, an kal zelna tura hlawhtlinna chang turin duhsakna kan hlan," an ti. Manager thar an zawn thu leh tunah chuan an player hlui Ljungberg chungah rinna an nghah thu an sawi tel bawk.

Arsene Wenger chhuah hnuah Emery-a'n Emirates Stadium a rawn pan a, Spanish manager lakah Gunners fans lam beiseina a sang thawkhat hle. Season hnih daih contract a ziak a, season hmasa khan Premier League-ah a sang pali zingah an tel phak teuh hle.

Amaherawhchu, season tawp lamah an zuih avangin pangana an ni - Champions League an khel phak lo. Europa League final lut mah se an elpui Chelsea an ngam loh avangin nomawi an chawi lo a, a hun hmasa lam hi chu ngaihhnathiam theih a ni.

Season thar an hmang a, beisei an phak chuang lo. October 6 hnu lamah league match bika chak an nei tawh lo a, a sang pali chin an phak lohna chu point riat zet a ni. Nilaini zan Europa League-a Eintracht Frankfurt an ngam loh khan inelna hrang hrangah match sarih chhung chu chak ni hmel an hmu ta lo.

Tun season Premier League manager 20 awm zinga pathum an ban ta. Emery hma hian Mauricio Pochettino leh Javi Gracia te chu Tottenham leh Watford manager an nihna aṭangin an lo ban tawh bawk - ban mai theih dinhmuna ding an awm nual bawk.

Arsenal hian an thuchhuah tawp lamah chuan, "Manager thar zawn hna chu thawh mek a ni a, hna hi zawh a nih hnuah thuchhuah dang siam leh a ni ang," an ti. Manager thar chu an zawng ngei a, thutlukna erawh an la siam fel lo tihna a ni.

Manager hna nei loa awm hming lian tak tak - Pochettino leh Massimiliano Allegri te bakah Manchester City assistant coach Mikel Arteta te an awm. Mahse, an sum dinhmun thlirin Gunners hian manager hlawh hnem an lak a rinawm loh a, Wolves manager Nuno Espirito Santo chu Emery thlak thei tura rinkai ber a ni.

Portuguese manager Nuno hi pa thluak ṭha tak a ni a, team nem zawka ngaih Wolves enkawl chungin club lian a ngam angreng hle - a team hi Premier League table-ah pangana a nihpui mek. Mahse, sulhnu lian a la nei lo a, player lian a hip a rinawm chiah lo bawk. Gunners fans tan lawm dan tur chintawk hriat a har rih ang.

Arsenal hian Pathianni zan dar 7:30 hian league match khel turin Norwich City an tlawh dawn a, manager lailawk Freddie Ljungberg tan senior team a enkawl pumhlumna hmasa ber a ni ang.

Kum 42 mi Ljungberg hi player a nih lai chuan a hlawhtling, 2002 leh 2004 khan Arsenal tan hian player pawimawh ni chungin Premier League nomawi a chawi tawh. Mahse, team enkawl lamah erawh a la patuai rih hle, 2018 khan Arsenal Under-23 coach a ni a, senior team assistant coach hna hi Arsenal hma hian Wolfsburg-ah thla ruk a lo thawk tawh bawk.