MPL khel zel turin A tawpah Chawnpui an him

Mizoram Premier League Season 8-ah Chawnpui FC chu hun rei zawk relegation zone-ah awm mah se coach Laldinthara hnuaiah harhtharna changin paruknaah an awm. Chawnpui hian relegation playoff pumpelh turin Ningani zan khan Mizoram Police chu 1-1 in an chelh a, an elpui FC Venghnuaiin Electric Veng lakah point khat tho an hlawhchhuah zui avangin season tharah MPL an khel zel ang.

Chawnpui hian league round zawha parukna dinhmun chelh zui turin FC Venghnuai point hmuh zat tho an hmuh a ṭul a, anni aia team ṭha zawka ngaih Mizoram Police lakah thapui an chhuah. Coach Thara hote hi an khel ṭha a, amaherawhchu minute 49-naah Lallawmsanga'n an lamah a tihluh avangin Police-in hma an hruai.

Police keeper Jess Lalthlamuana'n a vawi khat inlannaah Chawnpui goal khung tur a dan nasat avangin man of the match-ah thlan a ni a, chutihrualin Chawnpui captain Lalnunmawia goal khung tur a dan theih loh avangin 1-1 in inkhel a tawp. Chawnpui hi round 12-na thleng table mawngphahah an awm a, match hnuhnung pahnihah an elpui FC Venghnuai an chelh bakah Police an hneh avangin parukna nichunga season khar hi an phu a ni.