3-Nation Tourney umpire tur Ruati

December 3 aṭang hian Canberra, Australia-ah ram leh ram hockey inelna 3-Nations Tournament khelh a ni dawn a, he hunah hian India aiawhin Mizo nula Lalremruati chu umpire a ni ang.

Junior team inelnaah hian India, Australia leh New Zealand te vawi hnih ṭheuh an inkhel kual dawn a, December 8-ah zawh fel a ni dawn. India junior team-ah hian Lalrindiki leh Marina Lalramnghaki te chu an inlan dawn bawk.

India international player hlui, tuna internatonal referee ni ta Saitual nula Ruati chuan, "Inelna pawimawh tak maiah umpire chanvo ka chelh ve tur hi ka lawm a, hockey hi khelmual chhunga khelh mai bakah hetiang lama hmasawnna thlentute zinga ka tel ve thei hi ka lawm," tiin Vanglaini a hrilh.

India team hian nimin khan Kempegowda International Airport, Bengaluru aṭangin Australia hi an pan. Umpire Ruati hian Pathianni hian Delhi aṭangin inelna tur hmun hi a pan ve thung ang.