Spurs hmaah rin hlawh zawk Leipzig

Champions League round of 16 khelh hun a thleng a, inkhel hmuhnawm tak takin min hmuak zel. Zanin dar 1:30 hian Tottenham Hotspur pawh an inlan dawn a, German club ṭha RB Leipzig an mikhual dawn. 

Tottenham hian tun season Champions League-ah bul an ṭan ropui lo hle. Olympiakos chu an match hmasa berah 2-2 in an inhnehtawkpui a, Bayern Munich lakah 7-2 in an mualpho zui. 

Mahse, season hmasa finalist hi an match thumna aṭanga insiamṭhain goal khung an uar chho a, a tawpah group B-ah pahnihna niin a thiam 16 zingah an tel. 

Mauricio Pochettino thlaka Jose Mourinho-a'n Spurs a enkawl ṭan hnuah Champions League match hnih a khelhpui a, match khatah chakin match khatah 

an tlawm. 

German focotball expert Raphael Honigstein chuan, "Mi tam zawkin Leipzig chak an ring ang. He ngaihdan hi hrilhfiah theih dan pahnih a awm - pakhatnaah chuan Harry Kane a inhliam. 

"Pahnihnaah chuan Leipzig hi team ṭha tak an ni a, khawvel huap pawhin a tih theih kan hre tawh a ni," a ti a, Spurs aiin an ram club a dah sang zawk.  

Honigstein-a thusawi hian awmzia a nei - German club hian group G-ah hmahruaitu nichungin last 16 hi an lut a, Lyon, Benfica leh Zenit Saint Petersburg chungah awmin match rukah vawi khat chiah an tlawm. 

Bundesliga-ah champion beiseina an la nei mek bawk. Match 22 khelh tawhah point 45 neiin pahnihna an ni mek a, an chunga awm Bayern Munich an phak lohna chu point khat chauh a ni. 

Tottenham-in Pathianni zanah league match an nei a, harsa tak chungin Aston Villa chu 3-2 in an hneh hram - hahchawlhna hun nei loin Champions League khel turin an inbuatsaih nghal a ṭul.

Coach ṭawng duh ve tak Jose Mourinho a lungawi lo a, an fixtures neih dan a sawisel. Portuguese manager chuan, "An duh danin fixtures an duang mai mai a, eng angin nge club-in kan tawrh dawn an ngaihtuah lo. 

"Champions League game hautak em em neiin Leipzig kan hmachhawn nghal ang a, Inrinni zanah Chelsea kan tum lehnghal a ngai dawn bawk si. Kan hmabak a hautak takzet," a ti. 

Spurs tan Kane leh Moussa Sissoko an inlan thei dawn lo chiang a, Villa laka inlan thei lo Erik Lamela dinhmun a chiang lo bawk. Ben Davies lo kir hi Spurs tana chanchin lawmawm awmchhun a ni rih. 

Spurs-in hliam vangin Kane an chhawr thei lo a, English striker aiawh zo bera chhal ngam Son Heung-min inhliam thu an hre zui - South Korean striker hian a match hnuhnung pangaah goal a khung a, tun season-ah goal 16 khungin assist vawi riat a nei.

Kum 27 mi forward hi Aston Villa nen an inkhelh ṭumin a inhliam a, tun kar chhungin zai a ni dawn. He thu buatsaih laia thu thar berah chuan, “Kar engemaw zat a chawl dawn,” tih a ni. 

Leipzig erawh player langsar inhliam an awm lo a, English club-te chil ti puttu Timo Werner chu innnghahna a ni leh dawn - kum 23 mi striker hi Spurs defender-te tana buaina siam turin a tling tawk.

Werner hian Bundesliga-ah match 22 khelin goal 20 a khung tawh a, assist vawi ruk a nei bawk - Bundesliga-ah ani aia goal-a inrawlh hnem an awm lo. Champions League-ah goal thum a khung bawk. 

Manager ṭha hming lam rik a nihin Jose Mourinho hming lam hmaih a ni ngai lo a, Portuguese coach hian a kalna hmun apiangah nomawi a chawi ṭhin. 

Khawvela team ṭha ber ber Chelsea, Inter Milan, Real Madrid leh Manchester United lo enkawl tawh a nih avangin engtiklai mahin dah hniam theih a ni lo - Leipzig coach Julian Nagelsmann hi a rawn lar tirha 'Baby Mourinho' tia hminglem an pek a ni. 

Kum 32 mi coach hi Mourinho ang thoa tlarhnung lam dah pawimawh mi a ni a, a team a rem fel ṭhin hle. Mahse, Mou anga engtiklai pawha fimkhur a ni lo a, attacking football hmuhnawm tak pholan tel a duh ṭhin. 

Manchester City aṭanga a lakluh Angelino chuan Pep Guardiola nen an in an thu a sawi ve hlauh thung a, "Training-na hmuna an duh dan leh playing style-te chu a danglam lo hle a ni," tiin a sawi.