Spurs hmabak a hautak; City inlan dawn

Zanin Champions League khel tur zingah Premier League club langsar pahnih an tel a, Tottenham Hotspur leh Manchester City an ni. 

Spurs hian zanin dar 12:30-ah group B hmahruaitu Bayern Munich an mikhual dawn a, a harsa dawn tih a chiang - inkhel hmuhnawm beisei a sual lo ang. Group C-ah Manchester City-in zanin dar 12:30-ah vek Dinamo Zagreb an mikhual dawn a, mahni muala khel tur an nih bawk avangin City tan a harsa lutuk lo tura ngaih a ni. 

Spurs hian tun season-ah beisei an phak lo a, inelna an telnaah an la talbuai vek - City erawh result ṭha nei reng an ni thung a, team pahnih an in ang lo. 

Season hmasaah Champions League final an luh avangin Tottenham Hotspur-in phur takin season bul ṭan mah se an beisei ang an hmu lo. Premier League-ah point 10-in hmahruaitu Liverpool an phak lo mek a, League Two club Colchester United-in Carabao Cup aṭangin an pet chhuak bawk. 

Spurs hian Champions League-a an match hmasa berah Olympiakos chu 2-2 in an inhnehtawkpui ringawt bawk a, tunah an group-a team ṭha ber an hmachhawn dawn avangin point hloh a pawi dawn. Season ṭantira club lian tak tak nena sawi zawm  Mauricio Pochettino ban thu a ri ring viau a, he team boruak hi a ṭha lo tih hai rual a ni lo - Bayern tan thu hriat nuam a ni. 

Spurs-in Colchester an ngam loh ṭum khan Poch-a'n na takin a naute a sawisel a, London club player zingah lungawi lo an awm nual nia sawi a awm. England boss Gareth Southgate chu Spurs nen hian sawi zawm an ni a; Harry Kane, Dele Alli, Danny Rose, Eric Dier leh Harry Winks te ho Three Lions-a hmun siamsaktu a nih avangin a awm lo hran lo. 

Poch tan Spurs leh ama 'hmun' sawhnghet turin hnehna chan ngei ngei a ngai a, Bayern hi an ngam lo a nih ngat chuan group stage piahlam thlen lo ve theih a ni ang. Argentine coach-in point thum hmu tura a tih hmasak ber tur team boruak chhia siam ṭhat a ni a, a naute nen inrintawkna thar neih an mamawh. 

Spurs hmaa ding tur hi Bayern an ni kher kher a, an hna a awlsam dawn lo. German champion hian Bundesliga table chung ber an luah mek. Season bul ṭanna German Super Cup hnuah khan an tlawm leh tawh lo a, hei hian team 

ṭha an nihzia a nem nghet. 

Spurs tan Robert Lewandowski leh English football-a lo tlangnel tawh Philippe Coutinho chu ven fimkhur tur an ni dawn a, tlarhnung tan hna a tam dawn. Lewandowski hian league match ruk lekah goal 10 a khung tawh a, heti zat goal khung tura Bundesliga-a match mamawh tlem ber a ni. Coutinho hian match ruk a khelh tawhah goal hnih a khung tawh a, assist vawi hnih a nei bawk - Liverpool-a a 'magic' kha a nei let leh tawh a, namnul chi a ni lo. 

Paderborn laka inhliam vanga lakchhuah ngai Lucas Hernández chu Bayern tan London-ah a zin thei dawn a,  Ivan Perisic pawh a inlan theih tur thu sawi a ni. Leon Goretzka leh Jann-Fiete Arp erawh Bayern tan an inlan theih a beiseiawm lo a, German champion tan buaina tur ni erawhin a lang lo. 

Spurs league match hnuhnung berah Son Heung-min chu thlak ngai mah se Bayern hmachhawn tura a dam hman beisei a ni a, Son tel hi Spurs tan a ṭangkai. Harry Kane-a'n dan pangngaiin goal khung hna a thawk reng a, kum 26 mi striker hian tun season match rukah goal riat a khung tawh - Bayern tlarhnung a hlau lo ang. 

Manchester City-in Dinamo Zagreb an hneh ngei tura ngaih a ni a, Pep Guardiola team hi 'tu ber nge lut dawn?' tih hi an buaina a ni a, an ṭha tih a chiang. Mahse, Dinamo attacking midfielder Mislav Orsic chuan, "Thilmak ringtu kan nih avangin kan buai lo. City ṭhatna kan hria a, chutihrual chuan kan theihna kan hre ve tho a ni," tiin a zam lo. 

Orsic hian a match hnuhnung paliah goal nga a khung tawh a, Aymeric Laporte leh John Stones  tel loa khel tur City tan fimkhur a ṭul dawn. Dinamo hian an CL match hmasa berah Atalanta chu 4-0 ngawtin an sawp a, last 16 luh beiseina nen City lakah chak an tum ngam ang. Group C-ah Man City hi knockout stage lut ngei tura ngaih an ni a, hmunruak pakhat dang erawh club pathum dang tan a beisei theih vek. Point la hmu lo Atalanta leh Shakhtar Donetsk tan zanina an inkhel tur hi a pawimawh ang.

Group A

Real Madrid (0 pt)    10:25 PM    Club Brugge (1 pt)

Galatasaray (1 pt)    12:30 AM    PSG (3 pts)

Group B

Tottenham (1 pt)    12:30 AM    Bayern Munich (3 pts)

Red Star Belgrade (0 pt)    12:30 AM    Olympiakos  (1 pt)

Group C

Manchester City (3 pts)    12:30 AM    Dinamo Zagreb (3 pt)

Atalanta (0 pt)    10:25 PM    Shakhtar Donetsk (0 pts)

Group D

Juventus (1 pt)    12:30 AM    Bayer Leverkusen (0 pt)

Lokomotiv Moscow (3 pts)    12:30 AM    Atletico Madrid (1 pt)