India rawn zin turin Day a inpeih

October 10-a World Cup 2022 Qualifier-a India lenchilh tur Bangladesh coach Jamie Day chuan Blue Tigers hmachhawn a châk tawh thu a sawi a, "A bik takin coach Igor Stimac hmachhawn ka châk a ni," a ti. 

Arsenal midfielder hlui Day hian Gunners bakah Bournemouth tan pawh a lo khel tawh a, Three Lions tan Under 16, U17 leh U18-ah national jersey a lo ha tawh bawk. Day chuan, "Arsene Wenger hnen aṭanga ka thil zir tam tak kha ka chhawm zel a, ani zirtirna aṭang khan player enkawl dan tur thlengin ka hriat phah," a ti. 

India hian Kolkata khawpuiah Bangladesh team hi an lo mikhual dawn a, Guwahati-ah training camp an nei mek. Coach Igor Stimac-a'n player 29 a koh hmasak zingah Lallianzuala Chhangte leh Jerry Lalrinzuala an tel. 

Stimac hnuaia qualifier an khelhah Oman (2-1) an ngam lo a, Asian champion Qatar (0-0) an inhnehtawkpui thung. 

Day chuan, "Stimac nen hian a mimal takin kan inhre hran lo. Mahse, ka hmuh dan chuan player-te hian a hnuaia khelh nuam an tih hmel a, ka theihna chhin nan pawh ani hmachhawn hi a châkawm a ni," tiin a sawi.