Samthang tlangvalin Services chhan

Santosh Trophy champion lai Services chu final round lut lo thei dinhmuna an din laiin Samthang tlangval PC Lallawmkima rawn langin goal pawimawh a khung a, Services a chhanhim.

Nimin tlai khan Duler Stadium, Goa-ah Services leh Maharashtra ten group match hnuhnung ber an khel a, inkhelh hma hian point kua ve ve hmuin goal difference nei ṭha zawk Services tan draw a tawk. Amaherawhchu Maharashtra-in goal an khung hmasak avangin Services hi tla thei dinhmunah an ding. Minute 68-naah Services striker PC-a'n si phurh sutna goal a khung a, goal dang luh belh loin 1-1 in an inhnehtawk.

Goal difference hmangin Services-in West Zone group A aṭangin final round an lut a, he team-ah hian Santosh Trophy-a Mizoram an champion ṭuma defender pawimawh Zothanpuia'n (Thangpuia) inkhel bul a ṭan. Santosh Trophy final round khelh hun hi tihchian a la ni lo a, Kerala leh Tamil Nadu awmna South Zone-in qualifying an la khel lo.