England lakah Remsiami'n goal a khung

Tokyo Olympic qualifier atana inbuatsaih mek India nula hockey khel thiamte chu Pathianni zan khan England nen 1-1 in an inhnehtawk a, India hian goal an phurh hmasak hnuah Lalramsiami Hmar hmangin an sut.

Mualneitu Great Britain hian inkhel bul ṭan fuhin a tir lamah penalty corner vawi hnih an hmu nghal a, India tlarhnung khawng ṭha viau mah se minute riatnaah Maddie Hinch chuan goal hmahruai a khung. India an beidawng bik lo, minute 32-naah Kolasib tleirawl Siami chuan siphurh sutna a vaw lut. Thenzawl Hockey Training Centre aṭanga inzir chhuak hian hun ṭha nei leh mah se chakna goal erawh a khung thei ka bik lo.

England leh India hian match nga an khel dawn a, an match hmasa zawkah India hian 2-1 in hnehna an lo chang tawh. Zanin dar 8:00 hian an match thumna an khel leh ang. India nula te hi FIH Olympic Qualifiers khel turin an tling tawh a, tuna tour an neih hi chu qualifier atana inbuatsaihna chi khat a ni. FIH Olympic Qualifiers hi November 1-2 chhunga khelh tur niin India hmeichhe team hian world number 13 United States an hmachhawn dawn a ni.