Nunsanga a tlan chak ber

India rama bike intlansiakna Idemitsu Honda India Talent Cup 2019-ah K. Lalnunsanga a champion a, Mizo rider pakhat zawk Lalrinzuala Tlau chuan pathumna dinhmun a luah thung.

Inrinni leh Pathianni khan Kari Motor Speedway, Coimbatore-ah round ngana tlan niin, inelna vawi hnih neih a ni. Mizoram Motorsports Association rider Nunsanga hian pakhatna dinhmun luah ve vein a pumpuiah point 211 a hlawh chhuak.

Nungsanga hnungah hian point 170 neitu Samuel Martin leh Lalrinzuala Tlau (147 points) te an awm bawk. October 11 hian rider hlawhtlingte hi lawmman hlanna neih a ni ang. MiMSA president Lalfakzuala Hauzel chuan, "Kan nauten hlawhtlinna an chang zel hi a lawmawm takzet. Inelna min buatsaih saktu Honda, Mizorama awm Zote Honda leh rider nu leh pa ten an fate phal taka inelna an hmachhawn theih nan hun an siamsak ṭhin hi a lawmawm takzet," tiin Vanglaini a hrilh.