Ferrari hnehin Hamilton a chak

Ferrari boruak ṭhat loh niah Lewis Hamilton chu Russian Grand Prix-ah a chungnung a, Mercedes driver hi world champion nomawi a kawl lai humhim turin a dinhmun a ṭha ta hle.

Russia rama inelna neiha hnehna a chan avangin Hamilton hi amah hnaih bertu Valtteri Bottas aiin point 73 zetin a sang fal ta a, a vawi ruk nan a champion ngei a rinawm ta hle. A tir lama tlan ṭha tak Sebastian Vettel erawh engine chiang lo vangin a tlan tluan ve thei lo.

Sochi khawpuiah hian 2014 aṭang khan Formula 1 hi tlan a ni a, inelna neih ṭan aṭangin Mercedes hi an la chungnung char char. Britain tlangval hian car intlansiakna sang bera vawi 82 chak ni hmel hmu tur hian harsatna lian tham a tawk lo a ni.

Kum 34 mi Hamilton chuan, "Hun rei tak hnua hnehna chan leh ang mai a ni, a vawi khat nana chak pawh ka ang hial. Tunah hian champion sawi hun a la ni lo, intlansiak vawi khat atan chuan vawi khat chak hi a tawk," a ti.

Season tir lamah Mercedes an che ṭha a, hei vang hian fal takin an awm theih phah. Season chawhnu lamah erawh Ferrari an tluk meuh lo, August thla a tlan Hungarian Grand Prix hnuah tun ṭum hi Hamilton-a'n hnehna a chan lehna hmasa ber a ni.

Inelna hnuhnung pathumah Ferrari-in hnehna an chang vek a, Russia-ah pawh Charles Leclerc chuan a hmasa ber (pole position) aṭanga inelna bul aṭan avangin chak tura rinkai an ni. Ferrari hian ruahmanna siam sain Leclerc hian pahnihnaa awm Mercedes Hamilton dang a, pathumna aṭanga bul ṭan Vettel tana hun ṭha siamsak phawt a, chumi zawhah Vettel hian Leclerc hi a kian leh tur a ni.

Leclerc-a'n thupek zawmin Vettel a inlehpelh tir a, amaherawhchu world champion vawi li ni tawh hian amah aia naupang leh tawnhriat nei tlem zawk hi a kian duh lo. Radio kaltlangin Vettel hian, "Min kian lo pawh ni se kan tlan pel dawn hrim hrim," tiin a hrilh a, Leclerc chu tlan chak tura hrilh turin a hrilh let a, inlehpelh tir a tum lo.

Tih sual a neih ngun avanga sawisel hlawh Vettel hi a hnuah a khawl (engine) chiang lo vangin a tlan chhunzawm thei lo a, driver championship lamah pawh point 194 hmuin pangana a ni phak ṭawk chauh - Red Bull driver hlui hian car sen (Ferrari) hi a vanneih pui thei rih lo.

Ferrari driver naupang leh junior zawk Leclerc chuan, "A tirah hma ka hruai a, thupek ka hmuh angin Vettel kha kawng kawi pahnihnaah ka intlan pelh tir a, a hnu lamah khan kawng min kian ve leh thung tur a ni," tiin an team ruahman dan anga an kal loh thu a sawi.

German driver Vettel chuan, "Sawi chhuah ka duh lo, hnehna chan zawh loh hnua team boruak chungchang sawi kher a ngai ka ti lo," a ti. A chet dan chu Lewis Hamilton an hneh theihna tura ṭangkai a nih a rin thu a sawi bawk.

Vettel hian tun hmain hetiang buaina hi a lo nei tawh a, kum 2013 khan Red Bull-a a teammate Mark Webber hnungah tlan duh loin Malaysian GP-ah title a la tawh.  Tun ṭum boruakah erawh Vettel hi a upa zawk ni tawh mah se team thutlukna a zah loh avangin dem a hlawh.

Ferrari boss Mattia Binotto erawhin, "Ferrari-in driver ṭha tak pahnih kan neiah ka ngai," tiin Vettel dem zawngin a ṭawng chhuak lo.