PSG tana nun hlan huam Neymar

Paris Saint-Germain forward Neymar chuan French club tan a nun hlan a huam thu a sawi a, "PSG tana ka nun hlan turin he hmunah hian ka awm a ni," a ti. 

Brazilian forward hi nipui transfer-a Barcelona pan a tum avang khan PSG fans tam takin an duh lohna an lantir ṭhin a, mahse goal hmangin a chhanglet zel. Kum 27 mi striker hian match li an khelha vawi thumah PSG tan chakna goal a khung a, French club ṭantuten an mamawhzia an hriat belh zel. 

Neymar chuan, "Fan-te nen pawh kan inhrethiam ve zel a, ka duh ber chu he club puitu nih zel hi a ni," tiin khelmual pawn thlengin fan-te hneh a tum. PSG hian Inrinni zan khan league-ah Bordeaux chu 1-0 in an hneh a, Neymar khung niin Kylian Mbappe siamsak a ni. 

Neymar chuan, "Kylian nena kan inkawp leh thei ta pawh kha ka lawm a, hlim takin a football talent nen a lo kir leh a ni," tiin hliam vanga chawl reng French striker nen an khel dun leh thei ta chu a lawm thu a sawi. PSG hian zanin dar 12:30-ah Champions League match khel turin Galatasaray chu khualmualah an lenchilh dawn a, group A-a an match hmasa berah Real Madrid chu 3-0 in an lo sawp tawh. 

Real Madrid hian zanin dar 10:25-ah Club Brugge an mikhual dawn a, PSG laka an mualphona aṭangin thawhchhuah an tum ang.