Foxes hmaah Newcastle an zawr

Leicester City chuan an mikhual Newcastle United lakah zahngaihna an lantir lo. Brendan Rodgers-a naute hian Pathianni zan khan 5-0 ngawta hnehna changin Premier League table-ah pathumna dinhmun an luah.

King Power Stadium-a inkhelah Ricardo Pereira-a'n goal hmahruai a khung hnuin Magpies midfielder Isaac Hayden hnawhchhuah a ni a, inkhel chawhnu lamah chuan Foxes hian a khat mawi tawkin goal an khung deuh reng mai a ni.

Season bul ṭan fuh Leicester City hi bul ṭan fuh lo Newcastle ai chuan chak tura rinkai an ni sa. Rin lawk ang ngeiin minute 16-na lekah Pereira-a'n a khung ṭan a, inkhel an thunun chhawnzawm bawk.

Steve Bruce enkawl New-castle an ṭang thei viau a, mahse Hayden-a'n minute 43-naah ṭul lo taka midfielder Dennis Praet a tlawh avangin hnawhchhuah a ni a, goal phurh bakah player pakhata an tlem avangin beisei a tlem.

Second half-ah Foxes tan striker Jamie Vardy-a'n goal hnih a khung a, defender Paul Dummett-a'n Praet cross chu an mahni lamah a tih luh bakah hun tawp hma chiahin Wilfred Ndidi chuan an goal ngana a khung.

Kum 2015-16 season khan Leicester City hian khawvel barakhaihin Premier League nomawi an chawi a, a hnu lamah erawh result ropui leh chhuan tur an nei ta meuh lo. Brendan Rodgers kaihhruaina hnuaiah an insawhnghet chho mek, season hmasa pathumna Chelsea leh palina Tottenham chungah an awm.

Foxes manager Rodgers chuan, "Champions League hmun sawi nan chuan a la hma lutuk. Thil duhawm tak chu ni mah se tunah chuan eng tianga ṭhain nge kan khelh theih tih hi a pawimawh lai zawk chu a ni," a ti. UCL khelhna hmun ngaihtuah buai a tum rih lo.

Liverpool pawh enkawl tawh Rodgers chuan sawi zawmin, "Kan khingpui lamah hnawhchhuah an awm a nih chuan dinhmun chu a ṭha duh ngei mai. Chutihrualin ka naute kha an khel ṭha chungchuang a, goal khung châkin kan tuihal. Goal ṭha tak tak panga kan khung bakah kan goal lam kan venghim bawk," a ti.

Leicester City hian tun Inrinni (October 5) hian Liverpool an hmachhawn dawn a, an ṭha tawk takzet em tih chu fiahin a awm ang.

Nipui laia Steve Bruce-a'n a hna a thawh ṭan dawn khan atan 'chona' phurawm leh hautak a nih thu a sawi a, league match sarih an khelh thleng chuan a chona hi a la chhang let ṭha tawk lo hle. Point nga hmuin a hniam ber dawt an ni a, an hnuaiah hian Watford (2 points) chiah an awm.

Bruce-a naute hian goal khung an harsat a, match rukah goal li chiah an la khung. Manager hmasa Rafael Benitez-a'n a match hnuhnung bera a khung pui zat chauh kha a ni! Leicester City lakah an tlarhma a bil a ni satliah lo a, target zawna pet pawh an nei lo.

English manager Bruce chuan, "Red card chungchang kha chu sawi tur ka nei lo, ṭul lo taka thil tih a ni. Player 10 nih hnu chuan huaisen taka theih tawp chhuah zui a ngai ṭhin. Kan theihna angin kan khel lo a, kan tlawm hma lutuk a ni," tiin a player-te a dem thu a sawi. Magpies hi an insiamṭha vat lo a nih chuan Bruce thlakna tur kan hmuh thuai a rinawm.

Newcastle United hmabak a hautak chhunzawm dawn, an league match dawt leh atan October 6, Pathianni zan hian Manchester United an lenchilh ang. United hian nizan khan an mualah Arsenal an mikhual a ni.