Sumit Nagal tan nomawi

India tlangval tennis khel thiam Sumit Nagal chuan chanchin lawmawm a nei zel. Pathianni zana khelh zawh tak Buenos Aires Challenger-ah a champion a, ATP hnuaia challenger title pahnih a lakna chiah a ni.

Centre Court-a inkhelah Nagal hian world number 166 Facundo Bagnis chu 6-4, 6-2 in a hneh. Argentina khawpuia inelna neihah hian tualchhung tlangval champion tura rinkai Francisco Cerundolo leh Brazilian player Thiago Monteiro te chu a lo hneh tawh bawk.

Kum 22 mi Nagal hi Grand Slam hnuhnung ber US Open-ah khan Roger Federer nen an inkhel a, chak lo mah se a khingpui avang hian hriat a hlawh phah hle. Tunah hian world ranking-ah 135-na niin a tawn sang lai ber a ni.