World Cup stadium-ah Reds inkhel dawn

European champion Liverpool chu World Cup 2022 khelhna tur atana sak Education City Stadium-ah an inkhel dawn a, December 18-ah FIFA Club World Cup an khel dawn a ni. 

Liverpool hian Champions League nomawi an chawi avangin semifinal aṭangin Club World Cup hi an hmachhawn ṭan dawn a, Al Sadd/Hienghene Sport vs CF Monterrey inkhela chak zawk an tum ang. Doha khawpuia mipui 40,000 lenna tur stadium bakah hian Khalifa International stadium chuan Club World Cup hi a thleng dawn bawk a ni. 

Hetihlai hian Liverpool hi League Cup aṭanga paihchhuah theih dinhmunah an ding mek a, hei hi an match hmasa bera MK Dons an hneh ṭuma Pedro Chirivella inlan vang a ni. Pedro Chirivella hian season hmasa khan Spanish club Extremadura tan a khel a, a inlan lai hian international transfer certificate tihfel hman a ni lo. FA danah chuan Reds hi pawisa chawitir emaw inelna aṭanga paihchhuah hmangin hrem theih an ni.