Korea Open champion Kento Momota
Kento Momota chuan mipa badminton player ṭha chungchuang bik a nihna lantir zui zelin Korea Open champion a ni leh ta. Japan tlangval hian gold medal la turin Chou Tien-chen chu harsa lutuk loin a hneh.
Pathiannia final inkhelah kum 25 mi Momota hian minute 53 chhungin 21-19, 21-17 in hnehna a chang a, world number 1 hian semifinal-ah Indian shuttler Parupalli Kashyap 21-13, 21-15 in a lo hneh tawh bawk a ni.
Momota hi 2016 khan pawisa inthapna hmuna a kal avangin hrem a ni a, Rio Olympic khel tura thlan zingah tel tawh mah se hremna a hmachhawn avangin a inlan ve thei lo. Season khat chuang deuh a inkhelh theih loh hnuah a rawn kir a, a theihna a san avangin hun rei lote chhungin ranking-ah pawh a sang ber dinhmun a rawn luah lehnghal.
Hmeichhe singles final-ah Chinese nula He Bingjiao chuan Thailand shuttler Ratchanok Intanon chu 18-21, 24-22, 21-17 a hnehin a champion ve bawk.
Korea Open-a pakhatnate
Men's Singles Kento Momota
Women's Singles He Bingjiao
Men's Doubles Fajar Alfian
Muhammad Rian Ardianto
Women's Doubles Kim So-yeong
Kong Hee-yong
Mixed Doubles Dechapol Puavaranukroh
Sapsiree Taerattanachai