Spanish football hotu nih tum Casillas

Goalkeeping legend Iker Casillas chuan an ram football-a thuneitu sang ber ber Spanish Football Federation (RFEF)-a President dinhmun chelh tura a chuh ve tur thu a sawi a, tunah hian Porto-ah a awm mek. 

Kum 38 mi goalkeeper hi official takin a la chawl lo a, April 2019-a training-naa heart attack vanga a buai hnu khan khelmualah a inlan leh tawh lo - a inenkawl chhung hian club coaching staff zinga tel tura hna pek a ni. 

Casillas chuan a thutlukna hi Porto hnenah a hrilh tawh thu a sawi a, Portuguese club-in an thlawpna avanga a lawm thu a sawi bawk. RFEF hi kumin kum tawp lamah an inthlang dawn a, Real Madrid goalkeeper hlui hian president ni lai Luis Rubiales a khing ang. 

Casillas chuan a thutlukna hi twitter lamah puangzarin, "Spanish FA President ni turin ka chuh ve dawn a, ṭanrualna nen football khawvela hmun sang ber pawlah kan federation hi kan hlangkai dawn a ni," a ti.

Casillas hian kum 2015 khan Real Madrid aṭangin Porto hi a zawm a, Portuguese club tan Primeira Liga nomawi pakhat a chawi tawh. Real tan a khelh chhungin inelna hrang hrangah match 725-a khelhsak a, Champions League nomawi pathum leh La Liga nomawi panga a chawisak hman. 

Spain tan vawi 167 si ban nghaktuah a ṭang thei a, kum 2010 World Cup-ah a champion pui a, kum 2008 leh 2012 khan a zawnin European Championships nomawi a chawi bawk.